وفاقی وزیر داخلہ کا اگلے ماہ شروع ہونے والی یاترا کی تیاریوں کا جائزہ‘اٹھائے گئے سکیورٹی اقدامات سے آگاہ کیا گیا
’روایتی سکیورٹی نظام کو مزید مضبوط بنانے کیلئے جدید مانیٹرنگ سسٹمز اور دیگر جدید تکنیکی ذرائع کا استعمال کیا جائے‘
ایجنسیز
نئی دہلی؍۱۲ جون
مرکزی وزیر داخلہ امت شاہ نے متعلقہ سکیورٹی ایجنسیوں کو ہدایت دی ہے کہ شری امرناتھ یاترا کے پُرامن اور محفوظ انعقاد کے لیے ناقابلِ تسخیر اور جامع سکیورٹی انتظامات کو یقینی بنایا جائے۔
امت شاہ نے نئی دہلی میں منعقدہ ایک اعلیٰ سطحی جائزہ اجلاس کی صدارت کرتے ہوئے یاترا کی تیاریوں، سکیورٹی اقدامات اور مختلف اداروں کے درمیان تال میل کا تفصیلی جائزہ لیا۔
اجلاس میں جموں و کشمیر کے لیفٹیننٹ گورنر منوج سنہا، قومی سلامتی کے مشیر اجیت ڈوول، مرکزی داخلہ سکریٹری، بری فوج کے سربراہ، انٹیلی جنس بیورو (آئی بی) کے ڈائریکٹر، جموں و کشمیر کے چیف سیکریٹری اور ڈائریکٹر جنرل آف پولیس، مرکزی مسلح پولیس فورسز کے ڈائریکٹر جنرلز اور وزارت داخلہ، بھارتی فوج اور جموں و کشمیر انتظامیہ کے سینئر افسران نے شرکت کی۔
مرکزی وزیر داخلہ امت شاہ نے کہا کہ وزیر اعظم نریندر مودی کی قیادت میں حکومت امرناتھ یاترا پر آنے والے عقیدت مندوں کے لیے مضبوط سکیورٹی اور ہموار یاترا کو یقینی بنانے کے لیے پوری طرح پُرعزم ہے۔
امت شاہ نے ہدایت دی کہ تمام سکیورٹی ایجنسیوں کے باہمی اشتراک سے یاترا کے لیے ایک مربوط اور ناقابلِ تسخیر سکیورٹی حصار قائم کیا جائے۔ انہوں نے کہا کہ روایتی سکیورٹی نظام کو مزید مضبوط بنانے کے لیے ڈرونز، سی سی ٹی وی نگرانی، جدید مانیٹرنگ سسٹمز اور دیگر جدید تکنیکی ذرائع کا وسیع پیمانے پر استعمال کیا جائے۔
شاہ نے مزید ہدایت دی کہ جموں و کشمیر پولیس، مرکزی مسلح پولیس فورسز اور دیگر سکیورٹی ایجنسیاں یاترا کے راستوں پر کثیر سطحی سکیورٹی گرڈ قائم کریں۔
مرکزی وزیر داخلہ نے کہا کہ یاترا کے دوران مختلف مرکزی فورسز اور جموں و کشمیر پولیس کے سینئر افسران مسلسل کیمپوں میں موجود رہیں تاکہ تمام انتظامات کی نگرانی اور جائزہ لیا جا سکے۔
شاہ نے اس بات پر بھی زور دیا کہ یاتریوں کی رجسٹریشن، رہائش، طبی سہولیات اور آفات سے نمٹنے کے انتظامات سمیت تمام بنیادی خدمات کی مناسب فراہمی کو یقینی بنایا جائے۔انہوں نے بتایا کہ یاترا کی رجسٹریشن اور یاتریوں کی معاونت سے متعلق معلومات شری امرناتھ جی شرائن بورڈ کی ویب سائٹ سے حاصل کی جا سکتی ہیں۔
وفاقی وزیر مملکت نے ہدایت دی کہ یاتریوں کے قافلوں کی نقل و حرکت موجودہ موسمی حالات اور موسمی پیش گوئیوں کے مطابق سختی سے منظم کی جائے۔
شاہ نے مزید کہا کہ صرف یاترا کے راستوں ہی نہیں بلکہ جموں و کشمیر کے دیگر اہم سیاحتی مقامات پر بھی مضبوط سکیورٹی انتظامات کیے جائیں تاکہ یاتری محفوظ ماحول میں سیاحتی سرگرمیوں سے لطف اندوز ہو سکیں اور انہیں کسی قسم کی دشواری کا سامنا نہ کرنا پڑے۔
اجلاس کے دوران وزیر داخلہ کو بتایا گیا کہ یاترا سے وابستہ مقامی افراد اور جانوروں کی رجسٹریشن کے لیے انتظامات مکمل کر لیے گئے ہیں اور انہیں کیو آر کوڈ پر مبنی شناختی کارڈ جاری کیے جائیں گے۔
اس کے علاوہ یاترا سے وابستہ جانوروں کے طبی معائنے اور فٹنس جانچ کے لیے خصوصی کیمپ بھی منعقد کیے جائیں گے تاکہ یاترا کے دوران ان کی صحت اور استعداد کو یقینی بنایا جا سکے۔
