سروسز میں معمولی خلل صارفین، کاروباری اداروں، میڈیا تنظیموں اور ڈیجیٹل مارکیٹنگ سے وابستہ شعبوں پر نمایاں اثرات مرتب
(ویب ڈیسک)
سرینگر؍۱۲ جون
میٹا کی ملکیت والے سوشل میڈیا پلیٹ فارمز فیس بک، انسٹاگرام اور واٹس ایپ جمعہ کے روز عالمی سطح پر بڑے تکنیکی تعطل کا شکار ہو گئے، جس کے باعث دنیا بھر کے لاکھوں صارفین کو مختلف خدمات تک رسائی میں مشکلات کا سامنا کرنا پڑا۔
رپورٹس کے مطابق انسٹاگرام اور واٹس ایپ کے ویب ورژنز عارضی طور پر ناقابلِ رسائی ہو گئے، جبکہ ان کی موبائل ایپس معمول کے مطابق کام کرتی رہیں۔ دوسری جانب فیس بک سب سے زیادہ متاثر ہوا، جہاں ویب سائٹ کے ساتھ ساتھ موبائل ایپ اور میسنجر سروس بھی متاثر ہوئی۔
ابتدائی اطلاعات کے مطابق یہ تعطل عالمی نوعیت کا تھا اور مختلف ممالک میں صارفین نے بیک وقت مسائل کی شکایات درج کرائیں۔ انٹرنیٹ سروسز کی نگرانی کرنے والے پلیٹ فارم’ڈاؤن ڈیٹکٹر‘ پر امریکہ، یورپ، ایشیا، مشرق وسطیٰ اور دیگر خطوں سے ہزاروں صارفین نے سروس متاثر ہونے کی رپورٹ دی۔
متاثرہ صارفین کے مطابق انہیں لاگ اِن ہونے، پوسٹس لوڈ کرنے، پیغامات بھیجنے، تصاویر اپ لوڈ کرنے اور مختلف فیچرز استعمال کرنے میں دشواری پیش آئی۔ متعدد صارفین کو’Something Went Wrong‘ (کچھ غلط ہو گیا ہے) جیسے پیغامات بھی موصول ہوئے۔
میٹا کے ترجمان اینڈی اسٹون نے سماجی رابطے کی ویب سائٹ ایکس (سابقہ ٹوئٹر) پر جاری بیان میں کہا’’ہم اس بات سے آگاہ ہیں کہ لوگ اس وقت ہماری خدمات تک رسائی میں مشکلات کا سامنا کر رہے ہیں۔ ہماری ٹیم مسئلے کے حل کے لیے کام کر رہی ہے‘‘۔
ادھر میٹا کے اسٹیٹس پیج پر جاری ایک وضاحت میں کہا گیا کہ بعض مشتہرین کو Ads Manager میں اشتہارات تخلیق کرنے یا ان میں ترمیم کرنے میں بھی مشکلات پیش آ رہی ہیں۔
بیان میں کہا گیا’’ہماری انجینئرنگ ٹیمیں اس مسئلے سے آگاہ ہیں اور اسے جلد از جلد حل کرنے کے لیے سرگرم عمل ہیں‘‘۔
ماہرین کے مطابق میٹا کے تینوں بڑے پلیٹ فارمز ‘فیس بک، انسٹاگرام اور واٹس ایپ ‘ایک مشترکہ بیک اینڈ انفراسٹرکچر پر کام کرتے ہیں، جس کی وجہ سے ایک سروس میں پیدا ہونے والی تکنیکی خرابی دیگر پلیٹ فارمز کو بھی متاثر کر سکتی ہے۔
ٹیکنالوجی ماہرین کا کہنا ہے کہ چونکہ یہ تمام پلیٹ فارمز باہم مربوط سرورز اور نیٹ ورکنگ سسٹمز پر انحصار کرتے ہیں، اس لیے سرور فیل ہونے، نیٹ ورک میں خلل یا سافٹ ویئر کی خرابی کی صورت میں متعدد ایپس ایک ساتھ متاثر ہو سکتی ہیں۔
انہوں نے مزید کہا کہ ایسے واقعات کے دوران صارفین کو مواد لوڈ کرنے، پیغامات بھیجنے، تصاویر اپ لوڈ کرنے اور مختلف آن لائن سرگرمیوں میں مشکلات پیش آ سکتی ہیں۔
واضح رہے کہ میٹا کے پلیٹ فارمز دنیا بھر میں اربوں افراد استعمال کرتے ہیں اور ان کی سروسز میں معمولی تعطل بھی صارفین، کاروباری اداروں، میڈیا تنظیموں اور ڈیجیٹل مارکیٹنگ سے وابستہ شعبوں پر نمایاں اثرات مرتب کرتا ہے۔
تازہ ترین اطلاعات تک میٹا کی جانب سے تعطل کی حتمی وجہ بیان نہیں کی گئی تھی، تاہم کمپنی کے انجینئر مسئلے کے مکمل حل کے لیے کام کر رہے ہیں۔
ماہرین نے صارفین کو مشورہ دیا ہے کہ وہ ایسے مواقع پر اپنے اکاؤنٹس کی معلومات تبدیل کرنے یا بار بار لاگ اِن کی کوشش کرنے کے بجائے سرکاری اپ ڈیٹس کا انتظار کریں، کیونکہ زیادہ تر صورتوں میں یہ مسائل عارضی نوعیت کے ہوتے ہیں اور تکنیکی ٹیمیں جلد انہیں بحال کر دیتی ہیں۔
واضح رہے کہ گزشتہ چند برسوں کے دوران فیس بک، انسٹاگرام اور واٹس ایپ کو بھی کئی مرتبہ عالمی سطح پر تکنیکی خرابیوں کا سامنا کرنا پڑا ہے، جس کے باعث میٹا کے پلیٹ فارمز گھنٹوں تک متاثر رہے تھے۔
