ایجنسیز
پونچھ/جموں؍۱۲جون
جموں و کشمیر کے ضلع پونچھ میں مغل روڈ پر لاپتہ ہونے والے چار افراد کی گاڑی جمعہ کے روز چھتا پانی کے قریب ایک نالے سے برآمد کر لی گئی، جبکہ دو افراد کی لاشیں بھی نکال لی گئی ہیں۔
پولیس حکام کے مطابق جمعرات کو اطلاع موصول ہوئی تھی کہ مغل روڈ پر سفر کرنے والے چار افراد اپنی گاڑی سمیت لاپتہ ہو گئے ہیں، جس کے بعد بڑے پیمانے پر تلاش اور بچاؤ آپریشن شروع کیا گیا۔
جمعہ کے روز جاری آپریشن کے دوران لاپتہ گاڑی کو چھتا پانی کے قریب ایک نالے میں تلاش کر لیا گیا۔ بعد ازاں ریسکیو ٹیموں نے گاڑی کو باہر نکالا اور موقع سے دو افراد کی لاشیں برآمد کیں۔
حکام نے بتایا کہ باقی دو لاپتہ افراد کی تلاش کے لیے سرچ آپریشن بدستور جاری ہے۔ ریسکیو ٹیمیں علاقے میں تلاشی مہم چلا رہی ہیں اور لاپتہ افراد کا سراغ لگانے کے لیے ہر ممکن کوشش کی جا رہی ہے۔
پولیس کے مطابق آپریشن میں پیش رفت کے ساتھ مزید تفصیلات جاری کی جائیں گی۔
واضح رہے کہ مغل روڈ سرحدی اضلاع پونچھ اور راجوری کو جنوبی کشمیر کے ضلع شوپیاں سے ملاتی ہے۔ یہ سڑک دشوار گزار پہاڑی علاقوں سے گزرتی ہے اور خراب موسمی حالات کے دوران حادثات کے خطرات سے دوچار رہتی ہے۔
