رفیع آباد میں بادل پھٹنے کے نتیجے میں سیلابی صورتحال، کھڑی فصلوں کو نقصان

سرینگر//
شمالی کشمیر کے منڈ دجی حمام مرکوٹ رفیع آباد بارہ مولہ میں بادل پھٹنے کے باعث ندی نالوں میں طغیانی آئی جس وجہ سے کھڑی فصلوں کو نقصان پہنچا ، پانی کا تیز بہاؤ ایک پل اور متعدد درختوں کو اپنے ساتھ بہا کر لے گیا۔
اس بیچ منڈ دجی سیاحتی مقام پر پھنسے ہوئے مقامی اور غیر مقامی سیاحوں کو پولیس نے محفوظ مقام کی اور منتقل کیا۔
نامہ نگار نے بتایا کہ بدھ کی سہ پہر کو شمالی ضلع بارہمولہ کے منڈ دجی حمام مرکوٹ رفیع آباد میں موسم نے اچانک کروٹ لی جس کے ساتھ ہی بادل پھٹنے کے باعث ندی نالوں میں طغیانی آئی۔انہوں نے بتایا کہ چند منٹوں کے اندراندر ہی علاقے میں سیلابی صورتحال پیدا ہو ئی اور لوگ محفوظ مقامات کی اور بھاگنے پر مجبور ہوئے۔
نمائندے کے مطابق پانی کے تیز بہاؤ کے نتیجے میں متعدد درخت جڑ سے اکھڑ گئے جبکہ ایک پل کو بھی نقصان پہنچا ہے۔
منڈجی کے مقام درجنوں مقامی اور غیر مقامی سیلانی سیلابی صورتحال کے باعث پھنس کر رہ گئے تاہم پولیس کی بروقت کارروائی کے نتیجے میں اْنہیں بچا یا گیا۔
سرکاری ذرائع نے بتایا کہ بادل پھٹنے سے رفیع آباد کے منڈ دجی علاقے میں فصلوں کو نقصان پہنچنے کی اطلاع موصول ہوئی ہے۔اْن کے مطابق نقصان کا تخمینہ لگانے کی خاطر ٹیم کو روانہ کیا گیا۔
بادل پھٹنے کے باعث کسی کے زخمی ہونے کے بارے میں کوئی اطلاع موصول نہیں ہوئی۔
دریں اثناجموںکشمیر کے ضلع ڈوڈہ میں موسلا دھار بارشوں اور بادل پھٹ جانے کے باعث ندی نالوں میں طغیانی آنے سے کئی مکانات اور سرکاری عمارتوں کے علاوہ ایک پل کو پانی کے تیز بہاو نے اپنے ساتھ بہا کر لیا۔
مقامی ذرائع نے بتایا کہ ضلع ڈوڈہ کے کھارا گاوں میں درمیانی شب موسم نے کروٹ لی جس کے ساتھ ہی موسلا دھار بارشوں کا سلسلہ شروع ہوا ۔
ذرائع نے بتایا کہ بارشوں کے ساتھ ہی اونچے پہاڑوں پر بادل پھٹنے کے باعث ندی نالوں میں اچانک طغیانی آئی جس وجہ سے پانی رہائشی علاقوں میں گھس آیا۔
اُن کے مطابق ایک سرکاری مڈل اسکول کی عمارت، دو دکان، دو واٹر ملز اور ایک زیر تعمیر عمارت کے ساتھ ساتھ ایک پل کو بھی نقصان پہنچا ہے ۔
ذرائع نے بتایا کہ علامہ اقبال میموریل ایکاڈمی کے ساتھ ساتھ کئی سرکاری عمارتوں کو بھی نقصان پہنچا ہے ۔
مقامی لوگوں نے بتایا کہ درمیانی شب ڈوڈہ کے کھارا گاوں میں افرا تفری کا ماحول پھیل گیا کیونکہ بادل پھٹنے کے باعث ندی نالوں میں اچانک طغیانی آئی اور سیلابی پانی رہائشی بستیوں میں داخل ہوا۔
مقامی لوگوں نے ایل جی منوج سنہا سے اپیل کی ہے کہ متاثرہ علاقے میں فوری طورپر ایک اعلیٰ سطحی ٹیم کو بھیجا جائے تاکہ وہ نقصان کا تخمینہ لگا سکے ۔