ایجنسیز
سرینگر؍۱۰جون
نیشنل کانفرنس کے صدر‘ فاروق عبداللہ نے بدھ کے روز کہا کہ وزیر اعظم نریندر مودی نے جموں و کشمیر کے وزیر اعلیٰ عمر عبداللہ کو یقین دلایا ہے کہ وہ جموں و کشمیر کو ریاستی درجہ بحال کرنے کا اپنا وعدہ پورا کریں گے۔
اننت ناگ میں صحافیوں سے گفتگو کرتے ہوئے فاروق عبداللہ نے کہا کہ مرکز کی جانب سے اس وعدے کی تکمیل کا انتظار کیا جا رہا ہے۔
حکمران جماعت کے صدر نے کہا’’وزیر اعظم نے حال ہی میں عمر عبداللہ سے کہا ہے کہ وہ ریاستی درجے کی بحالی سے متعلق اپنا وعدہ پورا کریں گے‘‘۔
جموں و کشمیر حکومت کے کاروباری قواعد کی منظوری میں تاخیر سے متعلق سوال کے جواب میں فاروق عبداللہ نے کہا کہ ان کی جماعت صرف کاروباری قواعد کی منظوری ہی نہیں بلکہ ریاستی درجے کی بحالی بھی چاہتی ہے۔
ڈاکٹر فاروق نے کہا’’ریاستی درجہ ان کا دنیا کے سامنے کیا گیا وعدہ ہے۔ ہم اس کے پورا ہونے کا انتظار کر رہے ہیں‘‘۔
واضح رہے کہ نیشنل کانفرنس نے جموں و کشمیر کو ریاستی درجہ بحال کرنے کے مطالبے کی حمایت میں پارلیمنٹ کے آئندہ مانسون اجلاس کے پہلے روز نئی دہلی میں احتجاج کرنے کا اعلان کیا ہے۔
یہ فیصلہ۳جون کو وزیر اعلیٰ عمر عبداللہ کی صدارت میں منعقدہ حکمران جماعت کے اراکینِ اسمبلی کے اجلاس میں لیا گیا تھا۔
نیشنل کانفرنس کا مؤقف ہے کہ جموں و کشمیر کو مکمل ریاستی درجہ بحال کیا جانا چاہیے، جبکہ مرکزی حکومت متعدد مواقع پر ریاستی درجہ بحال کرنے کے اپنے عزم کا اظہار کر چکی ہے، تاہم اس کے لیے ابھی تک کوئی حتمی ٹائم لائن سامنے نہیں آئی ہے۔
