آئی سی سی ویمنز ٹی 20 ورلڈ کپ 2026 کے لیے اسٹارز سے سجی کمنٹری ٹیم کا اعلان

نئی دہلی،8جون ( یو این آئی)انٹرنیشنل کرکٹ کونسل (آئی سی سی) نے آئی سی سی ویمنز ٹی 20 ورلڈ کپ 2026 کے لیے عالمی معیار کی کمنٹری ٹیم کا اعلان کر دیا ہے، ۔آئی سی سی کے اعلان کے مطابق ٹورنامنٹ 12 جون سے انگلینڈ میں شروع ہوگا اور 5 جولائی کو لارڈز میں فائنل کے ساتھ اختتام پذیر ہوگا۔ ایونٹ کے تمام 33 میچوں کے دوران دنیا بھر کے معروف سابق کھلاڑی، کپتان اور براڈکاسٹرز اپنی خدمات انجام دیں گے۔کمنٹری پینل میں آسٹریلیا کی میل جونز، جولیا پرائس، انگلینڈ کی عیسی گوہا، ایبونی رینفورڈ برینٹ، ہندوستان کی متھالی راج اور انجم چوپڑا،پاکستان کی ثنا میر، نیوزی لینڈ کی کیٹی مارٹن، ویسٹ انڈیز کے کارلوس بریتھویٹ اور انگلینڈ کے ناصر حسین سمیت کئی نامور شخصیات شامل ہیں۔آئی سی سی کا کہنا ہے کہ اس کمنٹری ٹیم میں شامل شخصیات کرکٹ کے سب سے بڑے ایونٹس کا تجربہ رکھتی ہیں اور وہ شائقین کو میچز کے دوران اعلی معیار کی کوریج، تجزیے اور دلچسپ کہانیاں فراہم کریں گی۔