ایجنسیز
اننت ناگ؍۹جون
منشیات کے خلاف جاری سخت مہم کے تحت اننت ناگ پولیس نے ایک بڑی کارروائی انجام دیتے ہوئے ضلع کے بیجبہاڑہ علاقے کے تُلکھان گاؤں میں چھاپہ مار کر۱۰۴ گرام چرس نما مادہ اور۲۵ء۵۰لاکھ روپے نقد رقم برآمد کر لی، جبکہ ایک مبینہ منشیات فروش کو گرفتار کر لیا گیا۔
پولیس کے مطابق انہیں مصدقہ اور قابلِ اعتماد اطلاعات موصول ہوئی تھیں کہ ایک بدنام زمانہ منشیات فروش نے اپنے زیرِ تعمیر مکان میں منشیات چھپا رکھی ہے۔
اطلاع ملتے ہی پولیس کی ایک ٹیم نے تُلکھان میں واقع مذکورہ مقام پر چھاپہ مارا اور مکان کی مکمل تلاشی لی۔ تلاشی کے دوران زیرِ تعمیر مکان کی گراؤنڈ فلور پر پتھروں کے نیچے چھپائی گئی۱۰۴گرام چرس نما اسٹکس اور۲۵لاکھ۵۰ہزار روپے نقد رقم برآمد کی گئی۔
گرفتار شخص کی شناخت فاروق احمد ڈار ولد غلام حسن ڈار ساکن تُلکھان، بیجبہاڑہ کے طور پر ہوئی ہے، جسے موقع پر ہی حراست میں لے لیا گیا۔
پولیس نے بتایا کہ اس سلسلے میں متعلقہ پولیس اسٹیشن میں این ڈی پی ایس ایکٹ کی متعلقہ دفعہ کے تحت ایک ایف آئی آر درج کر کے مزید تحقیقات شروع کر دی گئی ہیں۔
تحقیقات کے دوران منشیات کے ماخذ، برآمد شدہ رقم کی نوعیت اور ملزم کے ممکنہ روابط کو بڑے منشیاتی نیٹ ورکس کے ساتھ کھنگالا جا رہا ہے۔
اننت ناگ پولیس نے منشیات کے خاتمے کے اپنے عزم کا اعادہ کرتے ہوئے کہا کہ منشیات کی اسمگلنگ اور اس غیر قانونی کاروبار میں ملوث عناصر کے خلاف کارروائیاں پوری شدت کے ساتھ جاری رہیں گی۔
پولیس نے عوام سے بھی اپیل کی کہ وہ منشیات فروشی اور منشیات سے متعلق دیگر غیر قانونی سرگرمیوں کے بارے میں معلومات فراہم کر کے قانون نافذ کرنے والے اداروں کے ساتھ تعاون کریں۔ پولیس نے یقین دلایا کہ اطلاع دینے والوں کی شناخت مکمل طور پر خفیہ رکھی جائے گی اور قانون شکن عناصر کے خلاف سخت قانونی کارروائی عمل میں لائی جائے گی۔
پولیس کے بیان میں کہا گیا کہ اننت ناگ کو منشیات سے پاک ضلع بنانے اور نوجوان نسل کے محفوظ مستقبل کو یقینی بنانے کے لیے منشیات کے نیٹ ورکس کے خلاف مہم جاری رکھی جائے گی۔
