پہلگام؍۱۶مئی
جنوبی کشمیر کے ضلع اننت ناگ میں ہفتہ کے روز ایک المناک سڑک حادثہ پیش آیا، جب ایک ٹویرا گاڑی پہلگام سے ارو کی طرف جاتے ہوئے بے قابو ہو کر گہری کھائی میں جا گری۔
حکام کے مطابق گاڑی کو رئیس احمد بٹ ولد محمد مقبول بٹ، ساکن رنگوارڈ لاری پورہ، چلا رہا تھا۔ حادثے میں گجرات سے تعلق رکھنے والے دو سیاح ہلاک جبکہ دو دیگر زخمی ہوگئے۔
متوفیوں کی شناخت باوِن بھاوسر ولد مہیش بھاوسر کے طور پر ہوئی ہے، جنہیں سب ضلع اسپتال پہلگام پہنچنے پر مردہ قرار دیا گیا، جبکہ ان کی اہلیہ آونی بھاوسر شدید زخمی حالت میں اسپتال منتقل کی گئیں، تاہم بائیں ٹانگ پر شدید چوٹ لگنے کے باعث وہ زخموں کی تاب نہ لاتے ہوئے دم توڑ گئیں۔
زخمی سیاحوں کی شناخت نینا بین زوجہ اشوک بھائی اور اشوک بھائی کے طور پر ہوئی ہے، جن کی مکمل شناخت فوری طور پر معلوم نہ ہو سکی۔ دونوں گجرات کے رہائشی ہیں اور ابتدائی علاج کے بعد انہیں مزید طبی نگہداشت کے لیے ریفر کیا جا رہا ہے۔
ادھر گاڑی کا ڈرائیور بھی حادثے میں زخمی ہوا ہے، جسے علاج کے لیے گورنمنٹ میڈیکل کالج (جی ایم سی) اننت ناگ منتقل کیا گیا ہے۔
پولیس نے واقعے کا نوٹس لے لیا ہے جبکہ مزید تحقیقات جاری ہے۔
