ممبئی انڈینس رائے پور پہنچ گئی، ہاردک پانڈیا کی غیر موجودگی موضوعِ بحث

رائے پور،7مئی (یو این آئی) ممبئی انڈینس 10 مئی کو شہید ویر نارائن سنگھ انٹرنیشنل کرکٹ اسٹیڈیم میں ہونے والے اپنے اہم آئی پی ایل میچ سے قبل رائے پور پہنچ گئی ہے، جہاں اس کا مقابلہ رائل چیلنجرز بنگلورو سے ہوگا۔
میچ شام 7:30 بجے شروع ہوگا، تاہم ٹیم کے کپتان ہاردک پانڈیا کی اسکواڈ کے ساتھ عدم موجودگی سب سے بڑی بحث بن گئی ہے۔
ہاردک پانڈیا ممبئی سے ٹیم کے ساتھ روانہ نہیں ہوئے تھے۔ وہ گزشتہ میچ میں بھی لکھنؤ سپر جائنٹس کے خلاف نہیں کھیلے تھے، جہاں سوریا کمار یادو نے ٹیم کی قیادت کی تھی۔
رپورٹس کے مطابق ہاردک کی غیر موجودگی کی وجہ کمر میں کھچاؤ ہے۔ فرنچائز نے واضح کیا ہے کہ ان کی عدم دستیابی صرف انجری سے متعلق ہے اور اس کے علاوہ کوئی اور مسئلہ نہیں۔
گزشتہ میچ کے ٹاس کے دوران سوریا کمار یادو نے بھی تصدیق کی تھی کہ ہاردک مکمل فٹ نہیں ہیں، اسی لیے قیادت میں تبدیلی کی گئی۔
اس وضاحت کے باوجود ان کی واپسی کے حوالے سے غیر یقینی صورتحال برقرار ہے، خاص طور پر ٹورنامنٹ کے اہم مرحلے میں مسلسل میچ نہ کھیلنے کی وجہ سے۔ اس سیزن میں ان کی فارم بھی خاصی متاثر رہی ہے اور وہ بلے اور گیند دونوں سے زیادہ اثر نہیں چھوڑ سکے ہیں۔
ادھر ھتیس گڑھ کے دارالحکومت رائے پور میں آئی پی ایل 2026 کے دو اہم مقابلوں کے تعلق سے کرکٹ شائقین میں زبردست جوش و خروش دیکھا جا رہا ہے۔ آئندہ 10 مئی کو ممبئی انڈینز (ایم آئی) اور رائل چیلنجرز بنگلورو (آر سی بی) کے درمیان ہونے والے ہائی پروفائل میچ اور 13 مئی کو آر سی بی اور کولکتہ نائٹ رائیڈرز کے مقابلے کے تعلق سے ٹکٹوں کی زبردست مانگ برقرار ہے۔ خاص طور پر ایم آئی اور آر سی بی کے میچ کے ٹکٹوں کی فروخت شروع ہونے کے چند ہی منٹوں میں ختم ہو گئی۔
منتظمین کے مطابق 2600 روپے سے 8000 روپے تک کے ٹکٹ آن لائن دستیاب کرائے گئے تھے۔ ان میں 2600 اور 2700 روپے کے زمرے کے قریب تین ہزار ٹکٹ سب سے پہلے فروخت ہوگئے۔ دوسری جانب 13 مئی کو ہونے والے آر سی بی اور کے کے آر مقابلے کے ٹکٹوں کی فروخت نسبتاً سست رہی ہے اور اب بھی تقریباً 40 فیصد ٹکٹ دستیاب بتائے جا رہے ہیں۔
ٹکٹوں کی زبردست مانگ کے درمیان کالا بازاری میں بھی تیزی سے اضافہ ہوا ہے۔ مارکیٹ میں سرگرم ایجنٹ ٹکٹوں کو مقررہ قیمت سے کئی گنا زیادہ قیمت پر فروخت کر رہے ہیں۔اطلاعات کے مطابق تقریباً 3000 روپے مالیت والے ٹکٹ 6000 روپے یا اس سے زیادہ میں فروخت کیے جا رہے ہیں۔ لوئر اور اپر اسٹینڈ کے ٹکٹ 5500 سے 8000 روپے تک پہنچ گئے ہیں، جبکہ پریمیم اے اور بی اسٹینڈ کے ٹکٹ 16000 روپے تک میں دستیاب کرائے جا رہے ہیں۔
اس دوران ممبئی انڈینز کی ٹیم رائے پور پہنچ چکی ہے۔ ٹیم کے کھلاڑی روہت شرما، سوریہ کمار یادو، نمن دھیر سمیت دیگر ارکان سخت سکیورٹی کے درمیان ایئرپورٹ سے براہ راست ہوٹل روانہ ہوئے۔ ایئرپورٹ پر بڑی تعداد میں موجود مداحوں نے کھلاڑیوں کا استقبال کیا۔ تاہم کپتان ہاردک پانڈیا ٹیم کے ساتھ نہیں پہنچے ہیں۔ ان کے وقت پر نہ پہنچنے کی صورت میں سوریہ کمار یادو کے ٹیم کی کمان سنبھالنے کا امکان ظاہر کیا جا رہا ہے۔ ٹیم نوا رائے پور میں واقع مے فیئر ہوٹل میں ٹھہری ہوئی ہے۔
رائل چیلنجرز بنگلورو کی ٹیم نو مئی کو وراٹ کوہلی کے ساتھ رائے پور پہنچے گی۔ ٹیم یہاں پانچ دنوں تک قیام کر کے دونوں مقابلوں کی تیاری کرے گی۔ کھلاڑیوں کا پریکٹس سیشن شام کے وقت منعقد کیا جائے گا تاکہ گرم موسم سے بچا جاسکے۔
سکیورٹی وجوہات کی بنا پر پریکٹس سیشن کے دوران شائقین کا داخلہ مکمل طور پر ممنوع رہے گا۔ ہوٹل کے احاطے میں بھی عام مداحوں کے داخلے پر روک لگائی گئی ہے۔ انتظامیہ نے اسٹیڈیم اور ہوٹل کے احاطے میں سکیورٹی کے وسیع انتظامات کیے ہیں اور پولیس و سکیورٹی ایجنسیوں کو مسلسل نگرانی کی ہدایات دی گئی ہیں