جاپان کا جنگ سے متاثرہ ممالک کے لیے 10 ارب ڈالر امداد کا اعلان

ٹوکیو، 16 اپریل (یو این آئی) جاپان نے ایران جنگ کے باعث معاشی مشکلات کا شکار ہونے والے آسیان ممالک کے لیے 10 ارب ڈالر کی بھاری مالی امداد کا اعلان کیا ہے۔
جاپانی وزیراعظم تاکائیچی نے ایشیائی رہنماؤں کے ساتھ ایک اہم آن لائن اجلاس کے بعد اس نئے تعاون کے فریم ورک کی تفصیلات جاری کیں، اس رقم کا بنیادی مقصد متاثرہ ممالک کو خام تیل اور توانائی کی بلا تعطل فراہمی یقینی بنانا ہے۔ جاپانی وزیراعظم نے نیوز کانفرنس کے دوران بتایا کہ جاپان پیٹرولیم سے تیار ہونے والی مصنوعات، بالخصوص طبی آلات کی فراہمی کے لیے جنوب مشرقی ایشیا پر انحصار کرتا ہے، اس لیے خطے کا استحکام جاپان کے لیے انتہائی اہمیت کا حامل ہے۔
جاپانی وزارتِ خارجہ کے مطابق یہ 10 ارب ڈالر کی امداد ان ممالک کی ایک سال کی خام تیل کی درآمدات کے برابر ہے۔ اس تعاون سے آسیان ممالک کو نہ صرف پیٹرولیم مصنوعات کی خریداری میں آسانی ہوگی بلکہ سپلائی چینز کو برقرار رکھنے اور ایندھن کے ذخائر بڑھانے میں بھی مدد ملے گی۔
اجلاس میں شریک فلپائن، ملائیشیا، سنگاپور، تھائی لینڈ، ویتنام، بنگلہ دیش اور جنوبی کوریا کے رہنماؤں نے جاپان کے اس بروقت اقدام کا خیرمقدم کیا ہے اور اسے خطے کی معیشت کے لیے ایک بڑی امداد قرار دیا ہے۔