قانون، ذمہ داری اور سچ کی بقا کا امتحان
جموں و کشمیر کی قانون ساز اسمبلی میں فیک نیوز اور غلط معلومات کے بڑھتے ہوئے رجحان پر ہونے والی حالیہ بحث اُس گہرے بحران کی عکاسی تھی جس نے نہ صرف صحافت بلکہ پورے سماج کی بنیادوں کو ہلا کر رکھ دیا ہے۔
اسپیکر عبدالرحیم راتھر اور دیگر اراکین کی جانب سے ایک جامع قانونی فریم ورک کی ضرورت پر زور دینا اس بات کا اعتراف ہے کہ مسئلہ اب محض اخلاقی اپیلوں سے حل ہونے والا نہیں رہا، بلکہ اس کے لیے مضبوط، متوازن اور دور اندیش پالیسی سازی ناگزیر ہو چکی ہے۔
یہ حقیقت کسی سے پوشیدہ نہیں کہ سوشل میڈیا کی آمد نے معلومات کے بہاؤ کو جمہوری بنا دیا ہے۔ اب خبر کسی ایک ادارے یا چند بڑے میڈیا ہاؤسز کی جاگیر نہیں رہی۔ ہر فرد ایک ممکنہ ’براڈکاسٹر‘ ہے۔ بظاہر یہ تبدیلی اظہارِ رائے کی آزادی کے لیے خوش آئند تھی، مگر اس کے ساتھ جو غیر ذمہ داری، بے لگامی اور سنسنی خیزی جڑی، اس نے سچ اور جھوٹ کے درمیان لکیر کو دھندلا کر دیا۔ نتیجہ یہ نکلا کہ آج خبر سے زیادہ ’وائرل‘ ہونا اہم ہو گیا ہے، اور تصدیق سے زیادہ رفتار کو ترجیح دی جا رہی ہے۔
اسمبلی میں اٹھنے والی آوازیں اسی بگڑتی ہوئی صورتحال کی طرف اشارہ کرتی ہیں۔ ایک طرف قانون سازی کی ضرورت پر زور دیا جا رہا ہے، تو دوسری طرف آزادی اظہار کے تحفظ کی بات بھی کی جا رہی ہے۔ یہی وہ نازک توازن ہے جسے قائم رکھنا سب سے بڑا چیلنج ہے۔ اگر قانون بہت سخت ہوا تو یہ اختلافی آوازوں کو دبانے کا ذریعہ بن سکتا ہے، اور اگر بہت نرم رہا تو فیک نیوز کا سیلاب یونہی جاری رہے گا۔ اس لیے وہی قانون مؤثر ہو سکتا ہے جو نہ صرف واضح ہو بلکہ اس کے نفاذ کا طریقہ کار بھی شفاف اور غیر جانبدار ہو۔
نائب وزیر اعلیٰ‘سرندر سنگھ چودھری کی یہ بات اپنی جگہ درست ہے کہ میڈیا کو خود احتسابی کرنی ہوگی۔ مگر سوال یہ ہے کہ کیا موجودہ ماحول میں خود احتسابی ممکن ہے؟ جب ریٹنگ، ویوز اور فالوورز ہی کامیابی کا پیمانہ بن جائیں، تو سچائی اکثر پس منظر میں چلی جاتی ہے۔ صحافت جو کبھی ذمہ داری، تحقیق
