غزہ//
اسرائیلی لڑاکا طیاروں نے آج ہفتے کے روز فلسطین کے علاقے غزہ کی پٹی میں متعدد مقامات پر بمباری کی۔ یہ بمباری غزہ کی پٹی سے اسرائیل کی جانب دو راکٹ داغے جانے کے جواب میں کی گئی ہے۔
فلسطین کے علاقے غزہ سے اسرائیل پر دو راکٹ جمعہ کی شام اس وقت داغے گئے تھے جب امریکی صدر اسرائیلی دورے کے خاتمے کے بعد سعودی عرب روانہ ہوگئے تھے۔
اسرائیلی فوج نے کہا ہے کہ اس نے وسطی غزہ میں ایک راکٹ بنانے والی مشتبہ فیکٹری پر بمباری کی ہے جو حماس تحریک کے زیر انتظام چلائی جا رہی تھی۔ عینی شاہدین نے بتایا کہ اس جگہ کو تربیتی کیمپ کے طور پر استعمال کیا جا رہا ہے۔
ہفتے کی صبح جنوبی اسرائیل میں دو بار سائرن بجائے گئے، جس میں آنے والے راکٹوں کی وارننگ دی گئی۔
اسرائیلی فوج نے اعلان کیا کہ اس نے غزہ کی پٹی سے ملک کے جنوب میں عسقلان شہر کی طرف دو راکٹ داغے جانے کا پتہ لگایا ہے۔فوج نے اپنے ٹویٹر اکاؤنٹ پر پوسٹ کیے گئے ایک مختصر بیان میں کہا: ’سائرن بجنے کے بعد غزہ کی پٹی سے عسقلان شہر کی جانب دو راکٹ داغے گئے۔
بیان میں مزید کہا گیا ہے کہ آئرن ڈوم سسٹم نے پہلے میزائل کو روکا، جبکہ دوسرا عسقلان شہر کے قریب ایک کھلے علاقے میں گرا۔
غزہ میں کسی گروپ نے ان دونوں راکٹوں کو داغنے کی ذمہ داری قبول نہیں کی ہے۔
تقریباً ایک ماہ میں یہ پہلا موقع ہے جب اسرائیلی فوج نے اعلان کیا ہے کہ اس نے غزہ کی پٹی سے راکٹ فائر کا پتہ لگایا ہے۔
