ریاسی؍۲۳مارچ
جموں و کشمیر کے ضلع ریاسی کے بُدھن علاقے میں پیر کے روز ایک سڑک حادثے میں کم از کم دو افراد موقع پر ہی جاں بحق جبکہ چار دیگر شدید زخمی ہو گئے، حکام نے بتایا۔
حکام کے مطابق حادثہ ایک ایکو کار‘جو بُدھن ڈاگن ٹاپ سڑک پر پیش آیا۔ یہ پہاڑی سڑک تیز موڑوں اور دشوار گزار راستوں کے لیے جانی جاتی ہے۔
حکام نے بتایا کہ گاڑی کن حالات میں حادثے کا شکار ہوئی، اس کی تحقیقات جاری ہیں، تاہم اس کے نتیجے میں فوری طور پر دو افراد کی موت واقع ہوئی اور متعدد افراد زخمی ہوئے۔
اطلاع ملتے ہی ریسکیو ٹیمیں اور مقامی انتظامیہ موقع پر پہنچ گئی اور زخمیوں کو قریبی طبی مرکز منتقل کیا گیا۔
حکام کے مطابق زخمیوں کی حالت تشویشناک بتائی جا رہی ہے۔پولیس نے واقعے کا نوٹس لیتے ہوئے مزید تحقیقات شروع کر دی ہیں تاکہ حادثے کی اصل وجہ معلوم کی جا سکے۔
مرنے والوں کی فوری طور پر شناخت نہیں ہو سکی ہے اور ان کی شناخت کے لیے کوششیں جاری ہیں۔
