ورلڈ کپ 2026 میں کامیابی کا راز: سوریہ کمار یادو نے پردے کے پیچھے کی کہانیاں سنا دیں

نئی دہلی ،11 مارچ (یواین آئی ) ہندوستانی ٹی ٹوئنٹی ٹیم کے کپتان سوریہ کمار یادو (اسکائی) نے انکشاف کیا ہے کہ آئی سی سی ٹی ٹوئنٹی ورلڈ کپ 2026 میں ہندوستان کی تاریخی فتح محض اتفاق نہیں تھی، بلکہ اس کے پیچھے ٹیم کا اتحاد، باہمی اعتماد اور کھلاڑیوں کی جذباتی وابستگی شامل تھی۔سوریا کمار یادو نے جیو اسٹار سے گفتگو کرتے ہوئے ٹیم کے اہم اراکین کے ساتھ ہونے والی دلچسپ گفتگو کا تذکرہ کیا۔
سوریہ نے بتایا کہ جب انہوں نے سراج کو فون کر کے بتایا کہ وہ ہرشیت رانا کی جگہ ٹیم میں شامل ہیں، تو سراج کا پہلا ردعمل حیرت اور خوشی کا ملا جلا تھا، انہیں لگا جیسے کوئی مذاق ہو رہا ہو۔سلیکشن میٹنگ سے قبل جب ایشان سے پوچھا گیا کہ کیا وہ ورلڈ کپ جتوانے میں مدد کریں گے، تو انہوں نے صرف اتنا کہا، "بھیا، بس مجھ پر بھروسہ رکھیں۔”
سوریہ کے مطابق سنجو نے ٹورنامنٹ کے دوران فراخدلی کا مظاہرہ کرتے ہوئے کہا کہ "بس مجھے بتائیں کہ میں ٹیم کے لیے کیا کر سکتا ہوں۔”
کپتان نے اسٹار بالر جسپریت بمراہ کی تعریفوں کے پل باندھتے ہوئے انہیں "قومی خزانہ” قرار دیا۔ انہوں نے کہا کہ بمراہ جانتے ہیں کہ وہ دنیا کے بہترین بالر ہیں، لیکن اس کے باوجود وہ اپنی محنت اور کردار میں کبھی کمی نہیں آنے دیتے۔
بطور کپتان اپنی سب سے بڑی مشکل کا تذکرہ کرتے ہوئے سوریہ نے کہا کہ ان کھلاڑیوں کو ذہنی طور پر تیار رکھنا سب سے مشکل کام تھا جو پلیئنگ الیون کا حصہ نہیں تھے۔ انہوں نے ان کھلاڑیوں کے ساتھ زیادہ وقت گزارا تاکہ وہ کسی بھی وقت میدان میں اترنے کے لیے ‘سوئچ آن’ رہیں۔