ایجنسیز
سرینگر؍۲مارچ
ایران اور امریکہ کے درمیان بڑھتی ہوئی کشیدگی کے تناظر میں جموں و کشمیر میں سیکورٹی کی صورتحال مزید سخت کر دی گئی ہے اور پورے خطے میں فورسز کو ہائی الرٹ پر رکھا گیا ہے۔
ذرائع کے مطابق موجودہ عالمی حالات اور علاقائی حساسیت کے پیش نظر سیکورٹی ایجنسیوں کو اس بات کی تاکید کی گئی ہے کہ وہ ہر ممکن چوکسی برتیں اور زمینی صورتحال پر مسلسل نظر رکھیں۔
ذرائع نے بتایا کہ ایران۔امریکہ کشیدگی کے پس منظر میں اطلاعات ہیں کہ جموں و کشمیر میں کچھ حلقوں کی جانب سے احتجاجی مظاہروں کی کوششیں کی جا سکتی ہیں۔ اسی خدشے کے پیش نظر پولیس، سی آر پی ایف اور دیگر مرکزی فورسز کو حساس علاقوں میں گشت تیز کرنے، اہم تنصیبات کے اردگرد حفاظتی دائرہ مضبوط بنانے اور ہجوم کنٹرول کے اضافی اقدامات کرنے کی ہدایت دی گئی ہے۔
حکام کے مطابق سوشل میڈیا پر افواہوں کے پھیلاؤ کو روکنے کے لیے سائبر سیل کو متحرک کیا گیا ہے جب کہ ان عناصر کے خلاف کارروائی کا فیصلہ کیا گیا ہے جو کشیدگی کو اشتعال انگیزی میں بدلنے کی کوشش کریں۔ انتظامیہ نے واضح کیا ہے کہ امن و قانون کی صورتحال بگاڑنے کی کسی بھی کوشش کو برداشت نہیں کیا جائے گا۔
ذرائع کا مزید کہنا ہے کہ تمام اضلاع کے ایس ایس پیز کو خصوصی بریفنگ دی گئی ہے اور انہیں مشورہ دیا گیا ہے کہ مذہبی اجتماعات، نماز جمعہ اور دیگر عوامی سرگرمیوں کے دوران اضافی سیکورٹی تعینات رکھی جائے تاکہ کسی بھی ناخوشگوار واقعے کو روکا جا سکے۔ اس کے علاوہ اہم شاہراہوں، سرکاری دفاتر، فوجی تنصیبات اور اہم سرکاری عمارتوں پر بھی نگرانی سخت کر دی گئی ہے۔
