میلان کورٹینا اولمپکس: نکیتا فلپوف نے ‘غیر جانبدار کھلاڑی’ کے طور پر پہلا تمغہ جیت لیا

بورمیو، اٹلی 20 فروری ( یو این آئی)روس سے تعلق رکھنے والے ایتھلیٹ نکیتا فلپوف نے میلان کورٹینا ونٹر گیمز میں ‘انفرادی غیر جانبدار کھلاڑیوں’ کے دستے کے لیے پہلا تمغہ جیت کر تاریخ رقم کر دی ہے۔ انہوں نے ‘اسکی ماؤنٹینیئرنگ’ کے مردوں کے اسپرنٹ مقابلے میں چاندی کا تمغہ اپنے نام کیا۔
بورمیو کے اسٹیلویو اسکی سینٹر میں کھیلے گئے اس مقابلے میں فلپوف نے بہترین کارکردگی کا مظاہرہ کیا۔ اسپین کے اوریول کارڈونا کول نے 2 منٹ 34.03 سیکنڈز کے ساتھ پہلی پوزیشن حاصل کی۔
نکیتا فلپوف محض 1.52 سیکنڈز کے فرق سے دوسرے نمبر پر رہے۔ فرانس کے تھیبالٹ اینسلمٹ ( 2.31 سیکنڈز) نے حاصل کیا۔
واضح رہے کہ ‘اسکی ماؤنٹینیئرنگ’ پہلی بار ونٹر اولمپکس کا حصہ بنی ہے، جس کی وجہ سے یہ تمغے مزید اہمیت اختیار کر گئے ہیں۔
مقابلے کے آغاز میں سوئٹزرلینڈ کے ارنو لیتھا اور جون کسلر نے 65 میٹر کی کٹھن چڑھائی میں برتری حاصل کر رکھی تھی، تاہم اسپین کے کارڈونا کول نے اپنی مہارت اور اسٹیمینا کا استعمال کرتے ہوئے واپسی کی اور پہلی پوزیشن چھین لی۔ فلپوف نے بھی بہترین تکنیک کا مظاہرہ کرتے ہوئے سوئس کھلاڑیوں کو پیچھے چھوڑا اور چاندی کے تمغے پر قبضہ جما لیا۔
یوکرین پر روسی حملے کے بعد سے روس اور بیلاروس کے کھلاڑیوں پر بین الاقوامی پابندیاں عائد ہیں، تاہم نکیتا فلپوف ان 20 کھلاڑیوں میں شامل ہیں جنہیں ‘AIN’ (Individual Neutral Athletes) کے طور پر شرکت کی اجازت دی گئی ہے۔یہ کھلاڑی کسی قومی پرچم یا ترانے کے بغیر شرکت کر رہے ہیں۔
شرکت کے لیے سخت شرائط رکھی گئی تھیں، جن میں جنگ کی حمایت نہ کرنا اور فوج کے ساتھ کوئی تعلق نہ ہونا شامل ہے۔