چھتہ بل علاقے میں آتشزدگی‘۱۰مکان خاکستر

سرینگر: سرینگر کے باغیاث چھتہ بل علاقے میں جمعرات کی صبح آتشزدگی کے ایک ہولناک واقعے میں کم سے کم۱۰رہائشی مکانوں کو شدید نقصان پہنچا۔
ذرائع نے بتایا کہ باغیاث چھتہ بل کے گنجان بستی والے علاقے میں جمعرات کی صبح آگ نمودار ہوئی جس کے شعلوں نے متصل واقع مکانوں کو اپنی لپیٹ میں لے لیا۔
انہوں نے کہا کہ اس ہولناک آگ کے شعلوں اور دھویں کو دور دور سے دیکھا جا سکتا تھا۔
محکمہ فائر اینڈ ایمر جنسی کے ایک عہدیدار نے بتایا کہ جمعرات کی صبح قریب ساڑھے۶بجے آتشزدگی کے واقعے کے بارے میں اطلاع موصول ہوتے ہی مختلف فائر اسٹیشنوں سے کم سے کم ایک درجن فائر ٹنڈرس اور۲موٹرس کو جائے موقع پر بھیج دیا گیا۔
انہوں نے کہا کہ چونکہ یہ گنجان بستی والا علاقہ ہے لہذا آگ تیز سے پھیل گیا تاہم فائر ٹنڈرس نے سخت مشقتت کرکے آگ کو قابو میں کر لیا۔
ان کا کہنا ہے کہ اس واقعے میں۱۰رہائشی مکان خاکستر ہوگئے تاہم کسی جانی نقصان کی کوئی اطلاع نہیں ہے۔موصوف عہدیدار نے بتایا کہ آگ لگنے کی وجوہات معلوم کی جا رہی ہیں۔
دریں اثنا پولیس نے اس سلسلے میں کارروائیاں شروع کی ہیں۔