پاکستان کی تاریخی فتح: آسٹریلیا کے خلاف ریکارڈز کی برسات

لاہور،2 فروری (یواین آئی ) پاکستان کرکٹ ٹیم نے آسٹریلیا کے خلاف ٹی ٹوئنٹی سیریز کے آخری میچ میں فتح حاصل کر کے نہ صرف کینگروز کا وائٹ واش کر دیا بلکہ ریکارڈز کی کتاب میں بھی نئے باب رقم کر دیے۔ اس تاریخی کامیابی کے ساتھ پاکستان، آسٹریلیا کو تین میچوں کی سیریز میں دو بار کلین سویپ کرنے والی پہلی ٹیم بن گئی ہے۔ پاکستان دنیا کی پہلی ٹیم بن گئی ہے جس نے آسٹریلیا جیسی مضبوط ٹیم کو ٹی ٹوئنٹی انٹرنیشنلز میں تین بار 100 رنز سے کم کے اسکور پر ڈھیر کیا۔
پاکستانی ٹیم نے کینگروز کے خلاف ٹی ٹوئنٹی فارمیٹ میں اپنا اب تک کا سب سے بڑا اسکور 207 رنز بورڈ پر سجایا۔ پاکستان نے آسٹریلیا کو 111 رنز کے بھاری مارجن سے شکست دی، جو آسٹریلیائی ٹیم کی اس فارمیٹ میں بدترین ناکامیوں میں سے ایک ہے۔
محمد نواز نے آسٹریلیائی بیٹنگ لائن کو تہس نہس کرتے ہوئے 5 وکٹیں حاصل کیں۔ وہ آسٹریلیا کے خلاف ٹی ٹوئنٹی میں 5 وکٹیں لینے والے پہلے پاکستانی با لر بن گئے۔ مجموعی طور پر وہ عمر گل کے بعد یہ کارنامہ انجام دینے والے دوسرے پاکستانی کھلاڑی بن گئے ہیں۔
شاہین شاہ آفریدی نے میچ کے پہلے ہی اوور میں وکٹ حاصل کر کے اپنے کیریئر کا ایک اور سنگ میل عبور کیا۔ وہ ٹی ٹوئنٹی کرکٹ کے پہلے اوورز میں مجموعی طور پر 25 وکٹیں لینے والے بالر بن گئے ہیں۔بیٹنگ کے شعبے میں کپتان بابر اعظم نے ایک بار پھر اپنی برتری ثابت کر دی۔ اس میچ میں نصف سنچری اسکور کر کے انہوں نے ٹی ٹوئنٹی انٹرنیشنلز میں سب سے زیادہ (39) نصف سنچریاں بنانے کا ویراٹ کوہلی کا عالمی ریکارڈ توڑ دیا، اور اس فہرست میں پہلے نمبر پر آ گئے۔