پاکستان بائیکاٹ کرو!

تو اُس پار سے خبر آئی ہے کہ پاکستان ‘بنگلہ دیش سے اظہار یکجہتی کیلئے ٹی ٹونٹی ورلڈ کپ کا بائیکاٹ کر سکتا ہے …….ٹور نامنٹ کھیلنے سے انکار کر سکتا ہے ۔ ابھی پاکستان نے کوئی حتمی فیصلہ نہیں لیا ہے لیکن پاکستانی کرکٹ بورڈ کے سربراہ ‘حسن نقوی کاکہنا ہے کہ حتمی فیصلہ وزیرا عظم کریں گے …….اب پاکستان کے وزیرا عظم کیا فیصلہ لیں گے اور جو وہ فیصلہ لیں گے وہ ان کاہی ہو گا یا اس معاملہ میں بھی آخری بات عاصم منیر کی ہی ہو گی ……. یہ ہم نہیں جانتے ہیں ‘ بالکل بھی نہیں جانتے ہیں ……. لیکن صاحب جو ایک بات ہم جانتے ہیں اور مانتے ہیں وہ یہ ہے کہ پاکستان کو اس مقابلے سے دور رہنا چاہئے …….اس کا بائیکاٹ کرنا چاہئے …….اللہ میاں یہ موقع کبھی کبھی اور کسی کسی کودیتا ہے اور اگر اللہ میاں نے اب کی بار یہ موقع پاکستان کو عنایت کیا ہے تو…….تو ہمسایہ ملک کو فوراً اس موقعے کافائدہ اٹھا کر ٹی ٹونٹی ورلڈ کپ کا بائیکاٹ کر نا چاہئے …….اور اس لئے کرنا چاہئے کہ بنگلہ دیش کی کرکٹ ٹیم اور اس ملک سے اس کا اظہار یکجہتی تو ہو ہی جائےگا ساتھ ہی ساتھ اس کی خود کی بھی عزت اور رہی سہی ساکھ بچ جائےگی اور……. اور اس لئے بچ جائےگی کیوں کہ بائیکاٹ کی صورت میں اسے بھارت سے نہیں کھیلنا پڑے گا اور……. اور جب پاکستان ، بھارت سے کھیلے گا ہی نہیں تو……. تو وہ میچ ایک بار پھر ہار ے گا نہیں ‘وہ ہار سے بچ جائےگا اور …….اور بھارت کے ہاتھوں مسلسل شکستوں سے اسے جس ہزیمت کا سامنا کرنا پڑتا ہے ……. جو ذلت اسے اٹھانی پڑتی ہے …….اس ذلت‘ اس رسوائی سے وہ بچ جائےگا اور…….اور سو فیصد بچ جائےگا ۔ اس لئے صاحب ہماری دُعا ہے……. اللہ میاں سے دعا ہے کہ پاکستان کے وزیر اعظم معاف کیجئے پاکستان کے فوجی سربراہ ‘ وزیرا عظم کو حکم دیں کہ وہ بنگلہ دیش سے اظہار یکجہتی کیلئے اس عالمی مقابلے کا بائیکاٹ کریں اور…….اور شہباز شریف بالکل ایسا ہی کریں تاکہ ……. تاکہ بے چارے عام پاکستانیوں کو بھارت کے ہاتھوں ہار کے بعد جس صدمے کا شکار ہونا پڑتا ہے …….انہیں جو مایوسی ہو جاتی ہے …….اس صدمے اور مایوسی سے یہ بچ جائیں ……. کہ بے چارے عام پاکستانی بھی تو مستحق ہیں……. اس بات کے مستحق کہ انہیں بار بار اپنی قومی ٹیم کی شکست نہ دیکھنی پڑے ۔ ہے نا؟