ایل جی کی اتر پردیش یومِ تاسیس کی تقریبات میں شرکت

جموں: جموں و کشمیر لوک بھون میں ہفتہ کے روز اتر پردیش یومِ تاسیس کی شاندار تقریبات کا انعقاد کیا گیا۔
تقریب سے خطاب کرتے ہوئے لیفٹیننٹ گورنر منوج سنہا نے اتر پردیش کے عوام کو دلی مبارکباد اور نیک تمنائیں پیش کیں۔
سنہا نے ریاست کی عظیم شخصیات، مجاہدینِ آزادی اور انقلابیوں کو خراجِ عقیدت پیش کیا اور جدید ہندوستان کی تعمیر میں ان کے کلیدی کردار کو یاد کیا۔
لیفٹیننٹ گورنر نے کہا’’ادبی شخصیات نے قدیم اتر پردیش کے خطے کو ہندوستان کا دل قرار دیا ہے، جو عظیم مذہبی صحیفوں—وید، اُپنشد، رامائن، مہابھارت اور پرانوں—کا گہوارہ رہا ہے۔میرے نزدیک اتر پردیش ایک ایسا سرچشمہ ہے جس نے ملک کی ثقافتی شعور کی آبیاری کی ہے‘‘۔
لیفٹیننٹ گورنر نے کہا کہ الفاظ اتر پردیش کی عظمت اور ہمہ جہتی دولت کو پوری طرح بیان کرنے سے قاصر ہیں، اسے حقیقی معنوں میں محسوس اور جینا پڑتا ہے۔
سنہا نے کہا’’یہی وہ سرزمین ہے جہاں گنگا، جمنا اور سرسوتی دریاؤں کا سنگم ہے—ایک مقدس مقام جو ہزاروں برس کی تاریخ اپنے دامن میں سمیٹے ہوئے ہے۔ یہ خطہ انسانیت کو ازلی حکمت عطا کرنے والا ایک روحانی مرکز ہے اور اپنی ثقافتی و ادبی وراثت کے ذریعے عالمی شعور کو جھنجھوڑتا ہے‘‘۔
خطے کی روحانی و ثقافتی خدمات پر روشنی ڈالتے ہوئے لیفٹیننٹ گورنر نے کہا کہ اتر پردیش ہندوستان کا حیاتیاتی مرکز ہے، جو شمال سے جنوب اور مشرق سے مغرب تک پوری قوم کو ایک لڑی میں پروئے رکھتا ہے۔
ایل جی نے مزید کہا’’اس متحرک خطے کی روحانی شخصیات نے گہری تفکر کے ذریعے ہمیں ایک بے مثال تعلیم عطا کی:کہ سب سے بڑی جستجو خود کو پہچاننے کی جستجو ہے۔سب سے گہرا سفر وہ ہے جو انسان اپنے باطن کی طرف کرتا ہے۔ یہ حکمت ہماری تیزی سے بدلتی ہوئی جدید دنیا میں رہنمائی فراہم کرتی ہے‘‘۔
لیفٹیننٹ گورنر نے اتر پردیش کی حالیہ ترقی کو بھی اجاگر کرتے ہوئے کہا کہ ریاست کی ترقی کی رفتار مثالی رہی ہے۔ انہوں نے خواہش ظاہر کی کہ آنے والے برسوں میں اتر پردیش مزید ترقی کرے، معاشی میدان میں نئی بلندیوں کو چھوئے اور خوشحالی کی راہ پر گامزن رہے۔
ثقافتی شام میں ہاتھرس سے رکنِ پارلیمنٹ شری انوپ پردھان، سینئر سرکاری افسران، طلبہ اور مرکز کے زیرِ انتظام خطے میں مقیم اتر پردیش کے باشندوں نے شرکت کی۔