دسویں اور بارہویں جماعت  کے نتائج بدھ کو:وزیر تعلیم 

سرینگر: جموں کشمیر بورڈ آف اسکول ایجوکیشن بدھ‘۱۴ جنوری کو دسویں اور بارہویں جماعت کے امتحانات کے نتائج کا اعلان کرے گا۔ یہ بات وزیر تعلیم سکینہ ایتو نے کہی۔
وزیر تعلیم نے کہا کہ طلبہ کے طویل انتظار کو مدنظر رکھتے ہوئے حکومت نے دونوں جماعتوں کے نتائج ایک ہی دن جاری کرنے کا فیصلہ کیا ہے۔
موصوفہ نے کہا’’ہم سمجھتے ہیں کہ طلبہ کافی عرصے سے نتائج کا انتظار کر رہے ہیں، اسی لیے یہ فیصلہ کیا گیا ہے کہ دسویں اور بارہویں دونوں جماعتوں کے نتائج بدھ کے روز جاری کیے جائیں گے‘‘۔
ایتو نے کہا کہ نتائج کے اعلان سے متعلق کمیٹی کی میٹنگ سیکریٹری جے کے بوس کے ذریعے طلب کی جائے گی، جس میں کشمیر اور جموں ڈویژن کے ڈائریکٹرز آف اسکول ایجوکیشن اور جوائنٹ سیکریٹریز سمیت دیگر اراکین شامل ہوں گے۔ انہوں نے مزید کہا کہ اس بار نتائج کے لیے انتظامی منظوری چیئرمین کے بجائے حکومت کی جانب سے دی جائے گی۔
یہ اعلان ایسے وقت میں سامنے آیا ہے جب جے کے بوس کے چیئرمین کا عہدہ تقریباً ایک سال سے خالی پڑا ہے۔ وزیر تعلیم نے کہا کہ نتائج کے اعلان کے بعد مستقل چیئرمین کی تقرری بھی کی جائے گی۔
دریں اثنا، جے کے بوس کے ایک عہدیدار نے بتایا کہ دسویں جماعت کے نتائج بدھ کے روز صبح کے وقت جاری کیے جائیں گے، جبکہ اسی دن بعد از دوپہر بارہویں جماعت کے نتائج کا اعلان کیا جائے گا۔