’بھارت کے نوجوان کھیلوں میں برتری کی نئی تاریخ رقم کررہے ہیں‘

جموں: لیفٹیننٹ گورنر ‘ منوج سنہا نے پیر کے روز دیو کے مشہور بلیو فلیگ سرٹیفائیڈ گھوگھلا بیچ پر دوسرے کھیلو انڈیا بیچ گیمز کی شاندار افتتاحی تقریب میں شرکت کی۔
اس تقریب میں دادرا و نگر حویلی اور دمن و دیو کے مرکز کے زیر انتظام علاقے کے ایڈمنسٹریٹر شری پرفل پٹیل بھی موجود تھے۔
اس موقع پر معزز وزیر اعظم شری نریندر مودی کا خصوصی پیغام پڑھ کر سنایا گیا، جس میں انہوں نے شریک کھلاڑیوں اور منتظمین کو دلی مبارکباد پیش کی۔
اجتماع سے خطاب کرتے ہوئے لیفٹیننٹ گورنر نے کہا کہ معزز وزیر اعظم نریندر مودی کی قیادت میں بھارت کھیلوں کے میدان میں ایک نئی انقلاب کا مشاہدہ کر رہا ہے۔
سنہا نے کہا’’ہم کھیلوں کی طاقت کے ذریعے نوجوانوں کو بااختیار بنانے کے لیے پُرعزم ہیں۔ کشمیر سے کنیا کماری تک، بھارت کے نوجوان کھیلوں میں برتری کی نئی تعریف کر رہے ہیں اور میدانوں سے پوڈیم تک ایک نئی تاریخ رقم کر رہے ہیں۔ آج کے نوجوان کھلاڑی صرف روایتی کھیلوں تک محدود نہیں بلکہ وہ پسینے، خوابوں اور فتح کے ساتھ نئی سرحدیں فتح کر رہے ہیں‘‘۔
لیفٹیننٹ گورنر نے کہا کہ کھیلو انڈیا بیچ گیمز کا یہ شاندار انعقاد حکومتِ ہند کے مضبوط کھیل کلچر کو فروغ دینے اور ساحلی کھیلوں میں بھارت کے نوجوانوں کے ابھرتے ہوئے عروج کا واضح مظہر ہے۔انہوں نے کہا کہ جموں و کشمیر اس قومی کھیل تحریک کا ایک سرگرم حصہ بننے پر فخر محسوس کرتا ہے۔
سنہا نے مزید کہا کہ یہ کھیل اعتماد اور قیادت کو فروغ دیں گے، جو عالمی مقابلوں میں جین زی کھلاڑیوں کے عروج کا باعث بنیں گے۔
لیفٹیننٹ گورنر نے کھلاڑیوں سے اپیل کی کہ وہ ’ایک بھارت، شریشٹھ بھارت‘ کے برانڈ ایمبیسیڈر بنیں اور دیو کی گرمجوش مہمان نوازی اور بیش قیمت ثقافت کو اپنے اپنے علاقوں تک پہنچائیں۔
سنہا نے کہا’’کھیلو انڈیا بیچ گیمز صرف تمغے جیتنے تک محدود نہیں ہیں بلکہ یہ بھارت کی ’سافٹ پاور‘ کو اجاگر کرنے اور دنیا کے سامنے ہماری ساحلی سیاحت کی صلاحیت کو پیش کرنے کا ایک مؤثر پلیٹ فارم ہیں۔‘‘
لیفٹیننٹ گورنر نے اس بات پر بھی زور دیا کہ بیچ گیمز ہمیں ماحولیاتی تحفظ اور ساحلی ماحولیاتی نظام کے تحفظ کی مشترکہ ذمہ داری کا احساس دلاتے ہیں۔
ایل جی نے کہا’’کھیل ذات، مذہب اور خطے سے بالاتر ہو کر لوگوں کو جوڑتے ہیں۔ آئیے ہم اتحاد کی طاقت سے ان کھیلوں کو کامیاب بنائیں اور بھارت کو عالمی معیار کی کھیلوں کی طاقت بنانے کی سمت مل کر کام کریں‘‘۔
لیفٹیننٹ گورنر نے شری پرفل پٹیل اور دادرا و نگر حویلی اور دمن و دیو کے عوام کو بھارت کے پہلے کثیر النوع بیچ گیمز(۲۰۲۴)اور کھیلو انڈیا بیچ گیمز کے افتتاحی ایڈیشن(۲۰۲۵)کی کامیاب میزبانی پر مبارکباد دی۔ انہوں نے تمام کھلاڑیوں کے لیے نیک تمناؤں کا بھی اظہار کیا۔
۲۰۲۶کا یہ ایڈیشن افتتاحی گیمز کی تاریخی کامیابی کے بعد منعقد کیا جا رہا ہے۔ آئندہ پانچ دنوں کے دوران۳۱ریاستوں اور مرکز کے زیر انتظام علاقوں سے۱۳۰۰سے زائد کھلاڑی آٹھ کھیلوں میں حصہ لیں گے، جن میں چھ مسابقتی اور دو نمائشی کھیل شامل ہیں۔ مسابقتی کھیلوں میں بیچ فٹبال، بیچ والی بال، بیچ سپک تکرا، بیچ کبڈی، بیچ پینچک سیلات اور اوپن واٹر سوئمنگ شامل ہیں، جبکہ بیچ ملاکھمب اور بیچ ٹگ آف وار نمائشی کھیلوں کے طور پر منعقد ہوں گے۔
افتتاحی تقریب میں ممتاز کھیل شخصیات، سینئر افسران، مختلف شعبہ ہائے زندگی سے تعلق رکھنے والے معزز شہری، کھیلوں کے شائقین اور بڑی تعداد میں نوجوانوں نے شرکت کی۔