جموں و کشمیر میں بجلی کے نرخوں میں کوئی عمومی اضافہ نہیں:وزیرِ اعلیٰ  

جموں: جموں و کشمیر کے وزیرِ اعلیٰ عمر عبداللہ نے جمعہ کے روز کہا کہ موجودہ مالی سال۲۰۲۶۔۲۰۲۵کے دوران یونین ٹیریٹری میں بجلی کے نرخوں میں کوئی عمومی اضافہ نہیں کیا جائے گا۔
وزیرِ اعلیٰ نے یہ اعلان اس خدشے کے پس منظر میں کیا کہ صبح اور شام کے اوقات میں بجلی کے استعمال پر۲۰فیصد اضافی چارج عائد کیا جا سکتا ہے۔
وزیرِ اعلیٰ کے دفتر نے سوشل میڈیا پلیٹ فارم ایکس پر ایک پوسٹ میں کہا’۲۰۲۶۔۲۰۲۵‘کے لیے جموں و کشمیر میں بجلی کے نرخوں میں کوئی عمومی اضافہ نہیں کیا جا رہا اور ٹائم آف ڈے(ٹی او ڈی) ٹیرف میں بھی کوئی تبدیلی نہیں کی گئی ہے۔‘‘
عمرعبداللہ نے کہا کہ حکومت بجلی کو سستا رکھ کر عوامی فلاح کو ترجیح دیتی رہے گی۔
واضح رہے کہ جموں و کشمیر پاور ڈیولپمنٹ کارپوریشن لمیٹڈ نے جوائنٹ الیکٹریسٹی ریگولیٹری کمیشن میں ایک عرضی دائر کی تھی، جس میں صبح اور شام کے اوقات میں صارفین پر عائد موجودہ۲۰فیصد سرچارج میں اضافے کی درخواست کی گئی تھی۔