شری ماتا ویشنودیوی شرائن بورڈ کا پنچانگ کیلنڈر اور ڈائری

جموں: لیفٹیننٹ گورنر منوج سنہا نے جمعہ کے روز لوک بھون میں شری ماتا ویشنو دیوی شرائن بورڈ (ایس ایم وی ڈی ایس بی) کا پنچانگ کیلنڈر۲۰۲۶اور سرکاری ڈائری کی رسمِ اجرا انجام دی۔
پنچانگ۲۰۲۶‘جو نامور علما اور پنڈتوں کی ماہرانہ رہنمائی میں مرتب کیا گیا ہے، عقیدت مندوں کے لیے ایک جامع روحانی رہنما کی حیثیت رکھتا ہے۔ اس میں سال۲۰۲۶ کیلئے مبارک تاریخوں (تھتھیوں)، تہواروں اور مذہبی رسومات سے متعلق تفصیلی معلومات فراہم کی گئی ہیں۔
لیفٹیننٹ گورنر نے شرائن بورڈ کی ان کوششوں کی ستائش کی جن کے ذریعے قدیم روحانی روایات کے تحفظ کے ساتھ ساتھ یاتریوں کے لیے جدید افادیت کو بھی یقینی بنایا جا رہا ہے۔ انہوں نے کہا کہ اس نوعیت کے اقدامات دنیا بھر میں عقیدت مندوں کے روحانی ربط کو مضبوط بناتے ہیں اور خدمت کے تئیں شرائن بورڈ کے عزم کو اجاگر کرتے ہیں۔
ایس ایم وی ڈی ایس بی کے چیف ایگزیکٹو آفیسر، سچن کمار ویشیہ نے بریفنگ دیتے ہوئے بتایا کہ یہ کیلنڈر شرائن بورڈ کی جانب سے عقیدت مندوں، سماجی بہبود اور ماحولیاتی پائیداری کے لیے وقف کئی اہم اقدامات کو بھی اجاگر کرتا ہے۔
بورڈ نے گرین ترکوٹا ہلز اقدام بھی شروع کیا ہے، جو شرائن کے اطراف قدرتی تقدس کے تحفظ کے لیے ایک ماحولیاتی مہم ہے؛ اس کے علاوہ عقیدت مندوں کے لیے مفت لنگر سیوا کی فراہمی؛ سوچھتا ابھیان، جو یاترا راستے پر صفائی اور اجتماعی ذمہ داری کے پیغام کو تقویت دیتا ہے؛ اور ضلع ریاسی میں پانچ مندروں کو عوام کے لیے وقف کرنا، جو خطے کے روحانی منظرنامے کو مزید مالا مال بنانے کے لیے بورڈ کی کوششوں کی علامت ہے۔
اس موقع پر لیفٹیننٹ گورنر کے پرنسپل سیکریٹری ڈاکٹر مندیپ کے بھنڈاری؛ ڈویژنل کمشنر جموں رمیش کمار؛ دیہی ترقی اور پنچایتی راج محکمہ کے سیکریٹری محمد اعجاز اسد؛ ایس ایم وی ڈی ایس بی کے ایڈیشنل سی ای او آلوک کمار موریہ اور شرائن بورڈ کے دیگر سینئر افسران بھی موجود تھے۔