سری لنکا کی بحریہ نے 12 تمل ماہی گیروں کو کیا گرفتار، اسٹالن نے وزیر خارجہ کو مکتوب لکھ کر ان کی رہائی کا مطالبہ کیا

چنئی، 23 دسمبر (یو این آئی) سری لنکا کی بحریہ نے منگل کی صبح تمل ناڈو کے 12 ماہی گیروں کو سری لنکا کے علاقائی پانیوں میں مبینہ طور پر مچھلی پکڑنے کے الزام میں گرفتار کیا۔ وزیر اعلیٰ ایم کے اسٹالن نے وزیر خارجہ ڈاکٹر ایس جے شنکر کو خط لکھ کر گہری تشویش کا اظہار کرتے ہوئے سفارتی ذرائع سے ان کی جلد رہائی کے لیے فوری اقدامات کرنے کی اپیل کی۔
ان ماہی گیروں کو، رامناتھ پورم ضلع کے جزیرے کے شہر رامیشورم سے ، سری لنکا کی بحریہ نے بین الاقوامی میری ٹائم باؤنڈری لائن (آئی ایم بی ایل) کو عبور کرنے کے الزام میں گرفتار کیا۔ بحریہ نے ان کی مشینی کشتی بھی قبضے میں لے لی اور ماہی گیروں کو مزید کارروائی کے لیے سری لنکا لے گئی۔ ماہی گیروں کی مسلسل گرفتاریوں سے ماہی گیری برادری میں مایوسی پھیل رہی ہے ، جو مرکزی اور ریاستی حکومتوں سے اس پیچیدہ مسئلہ کا دیرپا حل تلاش کرنے کی اپیل کررہے ہیں۔
دریں اثنا، مسٹر اسٹالن نے ڈاکٹر جے شنکر پر زور دیا کہ وہ دونوں ممالک کے درمیان جلد از جلد مشترکہ ورکنگ گروپ (جے ڈبلیو جی) ماہی گیروں کی سطح پر بات چیت بلائیں اور اس دیرینہ مسئلے کا دیرپا حل تلاش کرنے کے لیے تمام زیر حراست ماہی گیروں اور ان کی کشتیوں کی جلد از جلد رہائی کو یقینی بنائیں۔ مسٹر اسٹالن کے وزیر خارجہ کو لکھے گئے نیم سرکاری خط کی کاپیاں یہاں میڈیا کو جاری کی گئیں، جس میں ان کی توجہ رامیشورم سے ایک مشینی کشتی اور 12 ماہی گیروں کی گرفتاری کی طرف مبذول کرائی گئی۔
وزیر اعلیٰ نے کہا کہ یہ ماہی گیر کل رات رامناتھ پورم ضلع کے رامیشورم فش لینڈنگ سنٹر سے غیر رجسٹرڈ مشینی کشتی میں مچھلی پکڑنے گئے تھے ۔
وزیراعلیٰ نے کہا، "سری لنکا کی بحریہ کی طرف سے ہمارے ماہی گیروں کی مسلسل گرفتاری اور ان کی کشتیوں کو ضبط کرنے سے ان کی روزی روٹی بری طرح متاثر ہوئی ہے اور تمل ناڈو کی ساحلی ماہی گیری برادریوں کو بے پناہ مشکلات اور پریشانی کا سامنا کرنا پڑا ہے ۔”
مسٹر اسٹالن نے کہا کہ اس وقت تمل ناڈو کی کل 248 ماہی گیری کی کشتیاں اور 62 ماہی گیر (جن میں 2024 میں گرفتار کیے گئے 18 ماہی گیر بھی شامل ہیں) سری لنکا کی تحویل میں ہیں۔