مدورئی، 25 نومبر (یواین آئی ) ایف آئی ایچ ہاکی مینرز جونیئر ورلڈ کپ سے قبل جوش و خروش بڑھتا جا رہا ہے۔ جاپان اور چِلی چنئی پہنچ گئے ہیں، جبکہ اسپین اور آسٹریا مدورئی پہنچ کر 28 نومبر سے 10 دسمبر تک ہونے والے اس بڑے ایونٹ کے لیے اپنی آخری تیاریاں شروع کر چکے ہیں۔
جاپان جو اپنا چوتھا جونیئر ورلڈ کپ کھیلنے آ رہا ہے، پیر کی رات دیر سے پہنچا۔ جاپانی ٹیم کو پول سی میں ارجنٹینا، چین اور نیوزی لینڈ کے ساتھ رکھا گیا ہے۔ جاپان اپنا سفر 28 نومبر کو ارجنٹینا کے خلاف شروع کرے گا، 30 نومبر کو چین سے مقابلہ ہوگا اور یکم دسمبر کو نیوزی لینڈ کے خلاف گروپ مرحلہ مکمل کرے گا۔
جاپان کے فوراً بعد چِلی کی ٹیم پہنچی، جسے پول بی میں ہندوستان، عمان اور سوئٹزرلینڈ کے ساتھ رکھا گیا ہے۔
2023 ایڈیشن میں 15ویں نمبر پر رہنے والی چِلی اس بار بہتر کارکردگی کی امید کر رہی ہے۔ وہ 28 نومبر کو میزبان ہندوستان کے خلاف مہم کا آغاز کرے گی، پھر اگلے دن سوئٹزرلینڈ سے مقابلہ ہوگا اور 2 دسمبر کو عمان کے خلاف گروپ میچ کھیلے گی۔
اسی دوران اسپین جس نے 2005 اور 2023 میں دو بار کانسہ میڈل جیتا ہے ، اس بار اپنی کارکردگی میں بہتری لاکر میڈل کا رنگ بدلنے کے مقصد کے ساتھ میدان میں اترے گا۔ اسپین کو پول ڈی میں بیلجیم، مصر اور نمیبیا کے ساتھ رکھا گیا ہے اور وہ 28 نومبر کو مدورئی میں مصر کے خلاف اپنا آغاز کرے گا۔
آسٹریا جو 2016 کے بعد پہلی بار اور مجموعی طور پر دوسری بار اس ٹورنامنٹ میں حصہ لے رہا ہے (2016 میں 12ویں نمبر پر رہا تھا)، اپنے اس جونیئر ورلڈ کپ میں بہتر کھیل دکھانے کو بے تاب ہے۔ اسے پول ای میں انگلینڈ، ملیشیا اور نیدرلینڈز کے ساتھ رکھا گیا ہے۔ آسٹریا 29 نومبر کو مدورئی میں ملیشیا کے خلاف اپنے سفر کا آغاز کرے گا۔
