ہندوستان نے 1۔2 سے جیتی سیریز، ابھشیک ’پلیئر آف دی سیریز‘ منتخب

برسبین، 08 نومبر (یو این آئی) ہندوستان اور آسٹریلیا کے درمیان پانچواں اور آخری ٹی-20 میچ ہفتے کو شدید بارش کے باعث منسوخ کر دیا گیا، جس کے ساتھ ہی ہندوستان نے سیریز 1۔2 سے اپنے نام کر لی۔ سیریز میں 163 رنز بنانے والے ابھشیک شرما کو ’پلیئر آف دی سیریز‘ کے اعزاز سے نوازا گیا۔
میچ منسوخ کیے جانے کے وقت ہندوستان نے 4.5 اوور میں بغیر کوئی وکٹ کھوئے 52 رنز بنائے تھے۔ ابھشیک شرما (23) اور شبمن گل (29) ناٹ آؤٹ تھے۔ بارش اور بجلی کے خلل کے باعث کھیل بالآخر روک دیا گیا۔ خراب موسم کے سبب میچ شروع ہونے کے محض 21 منٹ بعد ہی کھیل بند کر دیا گیا۔
ہندوستان نے اس طرح آسٹریلیا کے خلاف ٹی-20 سیریز میں اپنا ناقابلِ تسخیر ریکارڈ برقرار رکھا۔ آسٹریلیا 2022 سے مسلسل چوتھی ٹی-20 سیریز ہارا ہے، جن میں سے تین ہندوستان اور ایک انگلینڈ کے خلاف ہیں۔
آسٹریلیا نے ٹاس جیت کر پہلے گیندبازی کا فیصلہ کیا۔ ہندوستان نے جارحانہ آغاز کیا اور 4.5 اوور میں 52 رنز جوڑ لیے۔ ابھشیک نے 13 گیندوں پر ناٹ آؤٹ 23 رنز ایک چوکے اور ایک چھکے کی مدد سے بنائے، جبکہ گل نے 16 گیندوں پر ناٹ آؤٹ 29 رنز میں چھ چوکے لگائے۔ گل نے بین ڈوَرشوس کے تیسرے اوور میں مسلسل چار چوکے لگائے۔
ابھشیک نے ہمیشہ کی طرح جارحانہ انداز میں اننگز کا آغاز کیا، اس دوران قسمت بھی ان کا ساتھ دیتی رہی۔ پہلے اوور میں گلین میکسویل نے مِڈ آف پر ان کا ایک آسان کیچ چھوڑ دیا، جبکہ چوتھے اوور میں بین ڈوَرشوس نے ان کا ایک ٹاپ ایج چھوڑ دیا۔ اگرچہ وہ اپنی بہترین فارم میں نہیں تھے، لیکن انہوں نے نتھن ایلس کی گیند پر ایک شاندار چھکا لگایا۔ اپنی اس اننگز کے دوران وہ بین الاقوامی ٹی-20 میں سب سے تیزی سے ایک ہزار رنز بنانے والے بلے باز بھی بن گئے۔ انہوں نے یہ کارنامہ صرف 528 گیندوں میں انجام دیا۔