دھروو جریل کی ناٹ آؤٹ سنچری، ہندوستان اے نے دیا 417 رنز کا ہدف

بینگلورو، 08 نومبر (یو این آئی) دھروو جریل (ناٹ آؤٹ 127)، ہرش دوبے (84) اور کپتان رشبھ پنت (65) کی شاندار اننگز کی بدولت ہندوستان اے نے ہفتے کو دوسرے غیر تسلیم شدہ ٹیسٹ میچ کے تیسرے دن سات وکٹ پر 382 رنز بنا کر اننگز ڈکلیئر کردی اور پہلی اننگز میں حاصل برتری کے بنیاد پر جنوبی افریقہ اے کو جیت کے لیے 417 رنز کا ہدف دیا۔
ہدف کا تعاقب کرتے ہوئے دن کے اختتام پر جنوبی افریقہ اے نے بغیر کوئی وکٹ کھوئے 25 رنز بنائے۔ ٹیم کو جیت کے لیے مزید 392 رنز درکار ہیں۔
ہندوستان اے نے اپنی اننگز کا آغاز کل کے اسکور 78 رنز پر تین وکٹ سے کیا۔ صبح کے سیشن میں ہندوستان کا چوتھا وکٹ کے ایل راہل (27) کے طور پر گرا جنہیں اوکُہلے سیلے نے بولڈ کیا۔ اس کے بعد کپتان رشبھ پنت میدان میں آئے لیکن تین بار زخمی ہونے کے بعد 34ویں اوور میں ریٹائر ہرٹ ہوگئے۔
ایسے نازک وقت میں دھروو جریل اور ہرش دوبے نے اننگز کو سنبھالا اور تیزی سے رنز جوڑے، اسکور کو 300 سے آگے لے گئے۔ اسی دوران شیپو موریکی نے ہرش دوبے (84) کو آؤٹ کرکے پویلین بھیجا۔ اس کے بعد رشبھ پنت دوبارہ بیٹنگ کے لیے آئے۔ ان دونوں کے درمیان 82 رنز کی شراکت ہوئی، جس دوران دھروو جریل نے شاندار سنچری مکمل کی اور رشبھ پنت نے نصف سنچری بنائی۔
رشبھ پنت 54 گیندوں پر پانچ چوکوں اور چار چھکوں کی مدد سے 65 رنز بنا کر کائل سمنڈز کا شکار بنے۔ اس کے بعد ہندوستان اے نے 89.2 اوور میں سات وکٹ پر 382 رنز پر اننگز ڈکلیئر کردی۔
جنوبی افریقہ اے کی جانب سے اوکُہلے سیلے نے تین وکٹ لیے، جب کہ شیپو موریکی، ٹیان وین وورین، پرینیلان سبریئن اور کائل سمنڈز نے ایک ایک وکٹ حاصل کی۔
دوسری اننگز میں جنوبی افریقہ اے نے 11 اوور میں بغیر نقصان کے 25 رنز بنائے۔ جورڈن ہرمن (ناٹ آؤٹ 15) اور لیسیگو سینوکوانے (ناٹ آؤٹ 9) کریز پر موجود تھے۔