زخمی کیمرون گرین کی جگہ لابوشین آسٹریلیائی ٹیم میں شامل

سڈنی، 17 اکتوبر (یو این آئی) زخمی کیمرون گرین ہندوستان کے خلاف ون ڈے سیریز سے باہر ہو گئے ہیں۔ آسٹریلیا نے ان کی جگہ مارنس لابوشین کو ٹیم میں شامل کیا ہے۔
کرکٹ آسٹریلیا نے جمعہ کے روز بتایا کہ گرین لو۔گریڈ سائیڈ سارنیس (پسلی کے پٹھوں میں کھچاؤ) کے سبب ون ڈے سیریز سے باہر ہونا پڑا۔ لابوشین شیلڈ میچ مکمل کرنے کے بعد ہفتہ کی رات ایڈیلیڈ سے پرتھ کے لیے روانہ ہوں گے تاکہ اتوار کو ہونے والے پہلے ون ڈے سے قبل ٹیم کے ساتھ شامل ہو سکیں۔
گرین نے حال ہی میں واپسی کی تھی۔ انہوں نے نیوزی لینڈ کے خلاف ٹی-20 دورہ چھوڑ دیا تھا اور پچھلے ہفتے پرتھ میں ویسٹرن آسٹریلیا کی جانب سے نیو ساؤتھ ویلز کے خلاف شیلڈ میچ کھیلا تھا۔ وہ میچ میں آٹھ اوورز گیندبازی کرنے والے تھے لیکن صرف چار اوور ہی کرا سکے اور ایک وکٹ حاصل کی، کیونکہ کرکٹ آسٹریلیا کے میڈیکل اسٹاف نے انہیں مسلسل دنوں میں بولنگ کرنے کی اجازت نہیں دی۔ ویسٹرن آسٹریلیا اپنی پہلی اننگز میں زیادہ دیر تک نہیں کھیل سکی، اس لیے چار اوورز کے اسپیل کے درمیان انہیں کافی آرام کا وقت نہیں ملا۔
گرین اب ایک مختصر ری ہیب (بحالی) کے عمل سے گزریں گے اور امید ہے کہ وہ 11 دن بعد ڈبلیو اے سی اے میں شروع ہونے والے ویسٹرن آسٹریلیا کے اگلے شیلڈ میچ میں کھیلنے اور گیندبازی کے لئے دستیاب ہوں گے۔
آسٹریلیا کے لیے یہ چوٹ تشویش کا باعث ہے کیونکہ ٹیم ایشیز سے پہلے گرین کے مکمل طور پر فٹ ہو کر بغیر کسی پابندی کے گیندبازی کی امید کر رہی تھی۔ ٹیسٹ کپتان پیٹ کمنز کی فٹنس پر بھی شبہ برقرار ہے۔ انہوں نے اس ہفتے کہا تھا کہ 21 نومبر کو پرتھ میں انگلینڈ کے خلاف پہلے ٹیسٹ میں کھیلنے کا امکان کم ہے۔