ہاکی : ہندوستان کا سلطان جوہر کپ میں فاتحانہ آغاز

جوہر باہرُو (ملائیشیا)، 11 اکتوبر (یو این آئی) — ہندوستانی جونیئر ہاکی ٹیم نے سلطان جوہر کپ 2025 میں اپنے افتتاحی میچ میں شاندار کارکردگی کا مظاہرہ کرتے ہوئے دفاعی چیمپئن برطانیہ کو 3-2 سے شکست دی۔
تمن دیا ہاکی اسٹیڈیم میں کھیلے گئے اس دلچسپ مقابلے میں کپتان روہت نے دو (45ویں، 52ویں منٹ) جبکہ رونیت سنگھ نے ایک (23ویں منٹ) گول اسکور کیا۔ برطانیہ کی جانب سے مائیکل رائیڈن (26ویں) اور کیڈن ڈریسی (46ویں) نے گول کیے۔
ابتدائی دو کوارٹرز میں ہندوستان نے جارحانہ انداز اپنایا اور متعدد مواقع بنائے، تاہم برطانوی دفاع نے مزاحمت کی۔ بالآخر 23ویں منٹ میں رونیت سنگھ نے پہلا گول داغا، مگر تین منٹ بعد رائیڈن نے اسکور برابر کر دیا۔
تیسرے کوارٹر میں کپتان روہت نے پینلٹی کارنر پر شاندار ڈریگ فلک کے ذریعے ہندوستان کو دوبارہ برتری دلائی، تاہم اگلے ہی منٹ ڈریسی نے پینلٹی اسٹروک پر گول کر کے میچ 2-2 سے برابر کر دیا۔ 52ویں منٹ میں ایک اور پینلٹی کارنر پر روہت نے فیصلہ کن گول کر کے ہندوستان کو فتح دلا دی۔
ہندوستان اب اپنا اگلا میچ اتوار کو نیوزی لینڈ کے خلاف کھیلے گا۔