سینیگال میں رفٹ ویلی بخار کے سبب سات افراد کی موت

ڈاکار، 29 ستمبر (یو این آئی) افریقی براعظم کے ملک سینیگال کے وزیر صحت ابراہیمہ سی نے کہا کہ شمالی سینٹ لوئس علاقے میں رفٹ ویلی بخار (آر وی ایف) کی وبا کے سبب سات افراد ہلاک ہو چکے ہیں۔
سینٹ لوئس میں اتوار کے روز وبا کے کنٹرول سے متعلق اجلاس میں مسٹر ابراہیمہ نے کہا کہ ہیلتھ افسران مویشی پروری کے محکمے کے ساتھ مل کر بیماری کے پھیلاؤ کو روکنے کے لیے تیزی سے اقدامات کر رہے ہیں۔ جمعرات کے روز سینٹ لوئس علاقے میں باضابطہ طور پر پہلا آر وی ایف کا کیس سامنے آیا تھا۔
صحت و عوامی صفائی ستھرائی وزارت میں وبائی امراض کی نگرانی کے سربراہ بولی ڈیوپ نے کہا کہ یہ ایک آر وی ایف وائرس ہے ، جو جانوروں سے پھیلتا ہے ۔ یہ پہلے زیادہ تر جانوروں میں پھیلتا ہے اور پھر متاثرہ جانور کے رابطے میں آنے والے انسانوں میں منتقل ہوتا ہے ۔ اس میں مریض کو بخار، سر درد، پٹھوں میں درد اور تھکن محسوس ہوتی ہے ۔
زیادہ تر کیس معمولی ہوتے ہیں، لیکن علاج میں تاخیر سے پیچیدگیاں بڑھ سکتی ہیں یا پھر مریض کی موت ہو سکتی ہے ۔ مسٹر ڈیوپ نے کہا کہ انسانوں میں انفیکشن عموماً متاثرہ جانوروں کے خون یا اعضاء کے رابطے میں آنے سے ہوتا ہے ۔ چرواہوں، کسانوں، قصاب خانوں کے ملازمین اور جانوروں کے ڈاکٹروں کے اس وائرس سے متاثر ہونے کا خدشہ زیادہ ہوتا ہے ۔
گزشتہ دہائیوں میں یہ بیماری مغربی افریقہ کے ممالک میں بار بارمیں سامنے آئی ہے ۔موریطانیہ، نائجر اور سینیگال جیسے ممالک اس وبا سے دوچار ہیں ۔ فی الحال انسانوں کے لیے کوئی مخصوص اینٹی وائرل علاج یا منظور شدہ ویکسین دستیاب نہیں ہے