آپریشن کَوَچ 10.0: جنوب مغربی ضلع پولیس کے 214 مقامات پر چھاپے

نئی دہلی، 23 ستمبر (یو این آئی) جنوب مغربی ضلع پولیس نے جرائم، غیر قانونی شراب اور منشیات کے خلاف سخت کارروائی کرتے ہوئے ‘آپریشن کَوَچ 10.0’ کے تحت 20 سے 22 ستمبر تک 48 گھنٹے کی سخت کارروائی کی۔ ڈپٹی کمشنر آف پولیس، جنوب مغرب امت گوئل کی ہدایت پر چلائی گئی،اس مہم کا بنیادی مقصد عوام کی حفاظت کو یقینی بنانا اور جرائم پر قابو پانا تھا۔
اس مہم کے دوران پولیس کی 94 ٹیموں نے خفیہ اطلاعات کی بنیاد پر 214 مقامات پر چھاپے مارے ۔ اس آپریشن نے منظم جرائم اور سماج دشمن عناصر کے خلاف موثر کارروائی کی ہے ۔
اس کے نتیجے میں منشیات کے خلاف این ڈی پی ایس ایکٹ کے تحت چھ معاملے درج کیے گئے اور 12 مجرموں کو گرفتار کیا گیا۔ پولیس نے 19.084 کلو گرام گانجہ اور 10.56 گرام اسمیک ضبط کی۔
غیر قانونی شراب کے خلاف ایکسائز ایکٹ کے تحت اٹھارہ معاملے درج کر کے اٹھارہ افراد کو گرفتار کیا گیا۔ پولیس نے کل 2,328 کوارٹر ، 42 ہاف، غیر قانونی شراب کے 98 پاؤچ، 30 بیئر کی بوتلیں اور 132 بیئر کین ضبط کیے ۔
غیر قانونی اسلحہ رکھنے پر سات معاملے درج کر کے سات افراد کو گرفتار کیا گیا۔ ان کے قبضے سے چھ چاقو، ایک دیسی ساختہ پستول اور دو کارتوس برآمد ہوئے ۔
دیگر مجرمانہ کارروائیوں میں، جوا ایکٹ کے تحت 10 مقدمات میں 21 افراد کو گرفتار کیا گیا اور Rs 10,320 کی رقم ضبط کی گئی۔ اس کے علاوہ پانچ اشتہاری مجرموں کو بھی گرفتار کیا گیا اور 278 گاڑیاں ضبط کی گئیں۔
اس آپریشن کے دوران پولیس نے متعدد احتیاطی کارروائیاں بھی کیں۔ 88 افراد کو مختلف دفعات کے تحت گرفتار کیا گیا، 150 کو سرعام شراب پینے پر پکڑا گیا اور 21 کو احتیاطے طور پر تحویل میں لیا گیا۔ پولیس نے 311 مجرموں اور ہسٹری شیٹروں سے بھی وسیع تفتیش کی۔
آپریشن کے دوران کئی اہم گرفتاریاں کی گئیں، جن میں انسداد منشیات سیل کی جانب سے کشن گڑھ کے ایک گودام پر چھاپہ مارا گیا، جہاں سے انہوں نے 16.486 کلو گرام چرس، غیر قانونی شراب کی 271 بولتیں اور وزن کرنے کی ڈیجیٹل مشین برآمد کی۔ اس معاملے میں تین ملزمین نویتا، سوشانت اور گوپال کو گرفتار کیا گیا ہے ۔
ساگر پور میں دو منشیات فروش سنتوش رائے عرف بنگالی اور عرفان کو گرفتار کیا گیا۔ سنتوش رائے کو پہلے ہی قتل اور چوری سمیت کئی سنگین الزامات کا سامنا ہے ۔ اس کے پاس سے 1600 گرام چرس برآمد ہوئی۔
ساگر پور پولیس نے روہت عرف مانو کو 10.56 گرام اسمیک کے ساتھ گرفتار کیا۔ روہت اس سے قبل ڈکیتی اور چوری کے نو مقدمات میں ملوث رہا ہے اور گزشتہ چھ ماہ سے منشیات فروخت کر رہا تھا۔