یشو بھومی میں بدھ سے ہوگا بایو انرجی اینڈ ٹیک ایکسپو کا آغاز

نئی دہلی، 23 ستمبر (یو این آئی) بایو انرجی اور کلین ٹیکنالوجیز پر مبنی انڈیا بایو انرجی اینڈ ٹیک ایکسپو کے دوسرے ایڈیشن کا انعقاد 24 سے 26 ستمبر تک دہلی کے دوارکا میں واقع یشو بھومی میں ہوگا۔
اس سال کانفرنس کا تھیم ‘ٹرانزیشن ٹو نیٹ زیرو: نِیڈ ٹو اسکیل اَپ بایو انرجی انیشی ایٹوز’ ہے ۔ اس موقع پر ملک میں ماحولیاتی وابستگی کے مطابق سبز توانائی کے حل پر بڑھتی ہوئی توجہ کو اجاگر کیا جائے گا۔ سڑک اور شاہراہوں کے مرکزی وزیر نتن گڈکری کانفرنس سے خطاب کریں گے ، جبکہ اختتامی اجلاس سے نئی اور قابل تجدید توانائی کے مرکزی وزیر پرہلاد جوشی خطاب کریں گے اور وہ انڈین گرین انرجی ایوارڈز بھی پیش کریں گے ۔ اسی دوران 25 ستمبر کو منعقدہ مکمل سیشن کی صدارت نئی و قابل تجدید توانائی کے وزیر مملکت شری پد نائک کریں گے ، جو بطور مہمان خصوصی پروگرام میں شریک ہوں گے ۔
منتظمین نے منگل کے روز بتایا کہ ایکسپو میں 170 سے زائد اعلیٰ نمائندے ، بین الاقوامی ماہرین، آنٹر پرینیور اور ریسرچ اسکالرز شریک ہوں گے ۔ توقع ہے کہ 500 سے زیادہ مندوبین 30 سے زیادہ سیشنز میں اپنے خیالات پیش کریں گے ۔ یہ سیشنز کئی اہم موضوعات پر منعقد ہوں گے جن میں کمپریسڈ بایو گیس (سی بی جی)، ایتھنول، جدید بایو فیولز، گرین ایوی ایشن فیول، بایوماس، سی سی یو ایس، کاربن مارکیٹس، بایو موبیلٹی اور گرین ہائیڈروجن شامل ہیں۔
ایکسپو میں 100 سے زیادہ کمپنیاں اپنی جدید ٹیکنالوجیز، مصنوعات اور حل پیش کریں گی۔ ان میں پراج انڈسٹریز، ریلائنس نیو انرجی، وِربیو اے ایم گرین، ٹی وی ایس، نووونیسس، ہیرو، ٹویوٹا، تھرمیکس، گیس لیب، کینیکس، انڈین آئل وینچرز، شری رینوکا شوگرز، این ٹی پی سی وغیرہ شامل ہیں۔ اتر پردیش اس تقریب کے لیے شراکت دار ریاست ہوگی اور سرمایہ کاری کے مواقع پر کئی سیشنزمنعقد کرے گی۔