جی ایس ٹی 2.0 کے پہلے دن آٹو سیکٹر میں زبردست تیزی

نئی دہلی، 23 ستمبر (یو این آئی) جی ایس ٹی میں نئی اصلاحات نافذ ہونے کے بعد پہلے ہی دن 22 ستمبر کو کئی کمپنیوں نے ریکارڈ سطح پر گاڑیاں فروخت کیں۔
سرکاری ذرائع کے مطابق ملک کی سب سے بڑی مسافر گاڑی بنانے والی کمپنی ماروتی سوزوکی نے پیر کے روز 30 ہزار گاڑیاں ڈلیور کیں اور اس دوران 80 ہزار انکوائریز موصول ہوئیں۔ یہ کمپنی کے 35 سالہ تاریخ میں ایک دن کی سب سے زیادہ ڈلیوری ہے ۔ اس کی دو بڑی وجوہات بتائی گئیں: پہلی یہ کہ نوراتری کے موقع پر لوگ گاڑیاں خریدنا مبارک سمجھتے ہیں اور دوسری وجہ یہ کہ جی ایس ٹی 2.0 میں ٹیکس کٹوتی کے اعلان کے بعد لوگوں نے خریداری مؤخر کر دی تھی اور پہلے دن ہی بھرپور فائدہ اٹھایا۔ توقع ہے کہ آنے والے تہواروں کے موسم میں بھی فروخت میں تیزی برقرار رہے گی۔ چھوٹی کاروں کی بکنگ میں عام تہواری سیزن کے مقابلے میں 50 فیصد اضافہ ہوا ہے ۔
جی ایس ٹی میں 22 ستمبر سے نافذ اصلاحات کے تحت چھوٹی گاڑیوں اور 350 سی سی تک کی موٹر سائیکلوں کی قیمتیں کم ہو گئی ہیں۔ ان پر 28 فیصد کے بجائے اب صرف 18 فیصد ٹیکس لگے گا اور ساتھ ہی اضافی محصول (سیس) بھی ختم کر دیا گیا ہے ۔
ہنڈائی کے ڈیلروں نے بھی ایک دن میں 11 ہزار یونٹس کی بلنگ کی، جو پچھلے پانچ سال کا ریکارڈ ہے ۔ ٹاٹا موٹرز نے پیر کے روز 10 ہزار گاڑیاں ڈلیور کیں اور 25 ہزار سے زیادہ انکوائریز موصول ہوئیں۔
تہواری موسم اور رکی ہوئی طلب کا اثر یہ بھی رہا کہ ہائیر کمپنی کے اے سی کی فروخت کسی عام پیر کے مقابلے میں تقریباً دوگنی ہو گئی۔ کئی لوگوں نے جی ایس ٹی شرح میں کٹوتی کے اعلان کے بعد پہلے ہی ایڈوانس بکنگ کرا لی تھی۔ بلو اسٹار کے اے سی کی فروخت 22 ستمبر 2024 کے مقابلے میں 20 فیصد زیادہ رہی۔ قابل ذکر ہے کہ جی ایس ٹی 2.0 میں اسپلٹ اے سی کی قیمتیں 3 ہزار سے 5 ہزار روپے تک کم ہو گئی ہیں۔
جی ایس ٹی میں ہائی اینڈ ٹی وی کی قیمتیں بھی 85 ہزار روپے تک گھٹ گئیں۔ سپر پلاسٹرونک کے 43 انچ اور 55 انچ ٹی وی سیٹ کی فروخت میں 30 سے 35 فیصد کا اضافہ ریکارڈ کیا گیا۔