ایشیا کپ میں پاکستان کے خلاف ہندوستان کے کھیلنے پرانوراگ ٹھاکر کی وضاحت

نئی دہلی، 13 ستمبر (یو این آئی) ایشیا کپ 2025 میں اتوار کے روز ہندوستان اور پاکستان کے درمیان ہونے والے میچ کے سلسلے میں بھارتیہ جنتا پارٹی (بی جے پی) کے رکن پارلیمنٹ انوراگ ٹھاکر نے کہا ہے کہ اگر ٹیم اس میچ میں حصہ نہیں لے گی تو وہ ٹورنامنٹ سے باہر ہو جائے گی۔
مسٹرانوراگ ٹھاکر نے ہفتہ کے روز صحافیوں سے گفتگو میں کہا، ”کسی بھی کثیر القومی ٹورنامنٹ، چاہے وہ اے سی سی ہو یا آئی سی سی، وہاں کسی بھی ملک کے لیے حصہ لینا مجبوری یا ضروری ہو جاتا ہے۔”انہوں نے کہا، ”اگر ٹیم حصہ نہیں لے گی تو ٹورنامنٹ سے باہر ہو جائے گی اور اس میچ کے پوائنٹس دوسری ٹیم کو مل جائیں گے۔”
بی جے پی رکن پارلیمنٹ نے کہا کہ ہندوستان ۔ پاکستان کے ساتھ دوطرفہ سیریز نہیں کھیلتا ہے۔انہوں نے کہا، ”ہم نے کئی برسوں سے یہ فیصلہ کیا ہے کہ ہندوستان ۔پاکستان کے ساتھ تب تک دوطرفہ سیریز نہیں کھیلے گا جب تک پاکستان ہندوستان پر دہشت گردانہ حملے بند نہیں کرتا۔”
ہندوستان اور پاکستان کے درمیان یہ میچ دبئی انٹرنیشنل کرکٹ اسٹیڈیم میں کھیلا جائے گا۔
اپوزیشن بھی اس میچ کی مخالفت کر رہی ہے۔ ان کا کہنا ہے کہ پہلگام حملے کے بعد ہندوستان ،پاکستان کے ساتھ میچ کیسے کھیل سکتا ہے؟
اس میچ کے خلاف جمعرات کو سپریم کورٹ میں ایک مفاد عامہ کی عرضی بھی دائر کی گئی تھی، جسے عدالت نے فوری طور پر فہرست میں شامل کرنے سے انکار کر دیا تھا۔