اب صاحب ہم اتنے بھی دانا اور عاقل نہیں ہیں جو ہم ان باتوں کو سمجھ سکیں جو اس وقت کیں جا رہی ہیں… نئے ورلڈ آدر سے متعلق کیں جا رہی ہیں… یہ سب باتیں ہمارے سر کے اُوپر سے جا رہی ہیں اور لاکھ کوششوں کے بعد بھی ہم ان باتوں کو سمجھ نہیں سکے ہیں… بالکل بھی نہیں سمجھ سکے ہیں… ممکن ہے کہ ایک نیا عالمی نظام… نیو ورلڈ آڈر تشکیل ہونے جا رہا ہے… ممکن ہے کہ ایسا ہی ہو اور… اور اس کے کچھ محر کات اور عوامل ہیں جن کی وجہ سے ایسا ہو رہا ہے یا ہو نے جارہا ہے… لیکن ان محرکات اور عوامل کو سمجھنا ہمارے بس کی بات نہیںہے… بالکل بھی نہیں ہے کہ… کہ اگر ہم کچھ سمجھ گئے ہیں تو… تو یہ ایک بات سمجھ گئے ہیں کہ… کہ اگر پہلگام میں دہشت گرد حملہ نہ ہوتا تو… تو بھارت میں اس حملے کا بدلہ لینے کی ضرورت محسوس نہیں ہوتی… اگر بھارت بدلہ نہیں لیتا تو… تو ہند پاک میں جنگ بھی نہیں ہو تی… اگر ہند پاک میں جنگ نہیں ہوتی تو… تو امریکی صدر اس جنگ کو روکنے کا دعویٰ(جھوٹا دعویٰ) بھی نہیں کر تے… اگر ٹرمپ دعویٰ نہیں کرتے تو… تو بھارت ان کے اس دعوے کی تردیدبھی نہیں کرتا … اگر بھارت ان کے اس دعوے کی تردیدنہیں کرتا تو… توٹرمپ ناراض نہیں ہو تے… اگر ٹرمپ ناراض نہیںہوتے تو… تو وہ ۵۰ فیصد ٹیرف بھارت پر عائد نہیں کرتے… اگر وہ اتنا ٹیرف بھارت پر عائد نہیں کرتے تو… تو بھارت کو دوسرا آپشن تلاش نہیں کرتا …اگر بھارت دوسرا آپشن تلاش نہیں کرتا تو… تو وہ چین کے ساتھ یاریاں نہیں بڑھاتا… اگر وہ چین کے ساتھ یاریاں نہیں بڑھاتا توچین بھی اس کا ہاتھ نہیں تھام لیتا… اگر چین اس کا ہاتھ نہیں تھام لیتاتو ٹرمپ کے تن بدن میں لگی آگ مزید بھڑک نہیں اٹھتی… اگر یہ آگ بھڑک نہیں جاتی تو وہ بھارت کو روس یوکرین جنگ کیلئے ’ذمہ دار‘ نہیں قرار دیتا… اگر وہ بھارت کو اس کیلئے ذمہ دار نہیں قرار دیتا تو… تو چین ‘ بھارت اور روس ایک ساتھ ایک ہی پلیٹ فارم پر جمع نہیں ہوتے… اگر یہ جمع نہیں ہوتے تو… تو نئے ورلڈ آڈر کی باتیں نہیں ہوتیں… بالکل بھی نہیں ہوتیں… اگر … اگر پہلگام نہیں ہوتا… بالکل بھی نہیں ہوتا ۔ ہے نا؟
نیو ورلڈ آڈر اور…؟
