مت شاہ توار کو جموں کے دو روزہ دورے پر آئیں گے

مرکزی وزیر داخلہ امت شاہ۳۱؍اگست سے دو روزہ دورے پر جموں آنے والے ہیں، جس دوران وہ حالیہ سیلاب سے متاثرہ علاقوں کا فضائی جائزہ بھی لیں گے ۔
یہ دورہ ایسے وقت ہورہا ہے جب جموں صوبے کے کئی اضلاع میں تباہ کن بارشوں اور طغیانی نے بھاری جانی و مالی نقصان پہنچایا ہے ۔
ذرائع کے مطابق امیت شاہ اپنے دورے کے دوران ۳۱؍اگست اور یکم ستمبر کو مختلف سطحی میٹنگوں کی صدارت کریں گے ، جن میں سیلابی صورتحال اور بحالی کے اقدامات پر غور کیا جائے گا۔
بتایا جاتا ہے کہ وہ سیلاب متاثرین کیلئے جاری ریسکیو اور ریلیف آپریشنز کی براہِ راست نگرانی کریں گے اور متعلقہ محکموں کے سربراہان سے صورتحال کی تازہ ترین رپورٹ طلب کریں گے ۔
وزیر داخلہ کے اس دورے کو جموں کشمیر میں حالیہ قدرتی آفت کے پس منظر میں نہایت اہم قرار دیا جارہا ہے ۔
توقع ہے کہ وہ سیلاب سے متاثرہ خاندانوں کی بازآبادکاری کے حوالے سے خصوصی امدادی پیکیج کا اعلان بھی کرسکتے ہیں۔
حکومتی ذرائع کے مطابق، امیت شاہ فضائی معائنہ کے علاوہ مختلف متاثرہ مقامات کے وفود سے بھی ملاقات کرسکتے ہیں تاکہ زمینی صورتحال کا قریب سے جائزہ لے سکیں۔ ان کے ہمراہ اعلیٰ سطحی افسران اور سیکورٹی حکام بھی رہیں گے ۔
دریں اثنافوج نے جموں میں دریائے توی پر ایک بیلی پل کی تعمیر شروع کر دی ہے جس کا رواں ہفتے کے آغاز میں شدید بارش اور ندی کے بہنے سے ایک حصہ بہہ گیا تھا۔
حکام نے بتایا کہ یہ واقعہ منگل کو پیش آیا، جب دریا میں پانی کی سطح بڑھنے سے پل کا کچھ حصہ گر گیا۔انہوں نے کہا’’پل کا ایک حصہ (جموں میں توی ندی پر چوتھا پل) ۲۶؍اگست کو گر گیا۔ ستواری چوک اور ایشیا کراسنگ کے درمیان یک طرفہ ٹریفک کھلا ہے ‘‘۔
ان کا کہنا ہے کہ یہ پل اہم رابطہ بحال کرے گا اور سیلاب سے متاثرہ علاقوں میں نقل و حرکت میں سہولت فراہم کرے گا۔
دریں اثنا، بارڈر روڈز آرگنائزیشن (بی آر او) نے بارش اور سیلاب کے بعد پیر پنجال پہاڑی سلسلے میں سڑک کی صفائی کا کام شروع کیا جس کی وجہ سے لینڈ سلائیڈنگ اور راجوری ضلع میں رابطہ منقطع ہوگیا تھا۔
محکمہ موسمیات (آئی ایم ڈی) نے جموں اور کشمیر کے کئی حصوں کے لیے موسمی الرٹ جاری کیا۔
آئی ایم ڈی نے خطے کے لیے موسم کی وارننگ جاری کی ہے ۔ پونچھ، ریاسی، راجوری، کشتواڑ اور ادھم پور اضلاع میں جمعہ کو پیلے رنگ کا الرٹ جاری کیا گیا ہے