بی جے پی کی کچرے سے آزادی کی مہم محض ایک دھوکہ ہے : اے اے پی

نئی دہلی، 21 اگست (یو این آئی ) عام آدمی پارٹی نے کہا کہ دہلی میں ہر طرف گندگی پھیلی ہوئی ہے اور دہلی کو کچرے سے پاک کرنے کی بی جے پی کی مہم محض ایک فوٹو شوٹ بن کر رہ گئی ہے ۔دہلی میونسپل کارپوریشن میں قائد حزب اختلاف انکش نارنگ نے جمعرات کو کہا کہ بدھ کو کارپوریشن ہیڈکوارٹر میں اسٹینڈنگ کمیٹی کی میٹنگ ہوئی، جس میں کچرے کے مسئلے پر بات ہوئی تو یہ بات سامنے آئی کہ دہلی میں‘دہلی کو کچرا سے آزادی’نامی ایک ماہ طویل مہم چل رہی ہے ، جس کا آغاز وزیر اعلیٰ نے میئر اقبال سنگھ کے ساتھ مل کر کیا تھا۔ انہوں نے کہا کہ عام آدمی پارٹی شروع سے کہہ رہی ہے کہ یہ مہم محض دھوکہ ہے ۔ میئر یا وزیر اعلیٰ ریکھا گپتا ان مقامات پر جا کر تصویریں بنواتے ہیں، جن کی صفائی ہمارے محنتی صفائی کارکنان پہلے ہی کر چکے ہوتے ہیں ۔
مسٹر نارنگ نے کہا کہ کارپوریشن کمشنر نے بھی اعتراف کیا کہ سینٹرل زون، ساؤتھ زون اور ویسٹ زون میں کچرے کا مسئلہ سنگین صورت حال اختیار کرچکا ہے ۔ میں نے سول لائنز زون کا بھی ذکر کیا، جہاں وزیرآباد کے مجلس پارک اور رام گھاٹ میں کچرے کے ڈھیر لگے ہوئے ہیں۔ یہاں تک کہ میئر کے گھر کے اطراف کوڑا کرکٹ جمع ہے ۔
انہوں نے کہا کہ میں بی جے پی سے ایک سوال پوچھنا چاہتا ہوں کہ آج دہلی میں ان کی چار انجن والی حکومت ہے ۔ مرکزی حکومت، دہلی حکومت، کارپوریشن اور لیفٹیننٹ گورنر سبھی ان کے کنٹرول میں ہیں۔ کارپوریشن ایکٹ میں ترمیم کرکے انہوں نے تمام اختیارات مرکزی حکومت کو دے دیے ، پھر مرکز سے فنڈ حاصل کرنے میں کیا کیا دقت ہو رہی ہے ؟ کمشنرکہہ رہے ہیں کہ اب کارپوریشن کے پاس پیسے نہیں ہیں۔
اے اے پی لیڈر نے کہا کہ جب سے بی جے پی دہلی حکومت اور کارپوریشن میں برسراقتدار آئی ہے ، اس کے دور اقتدار میں ہر ایک سڑک کوڑا کرکٹ میں تبدیل ہو رہی ہے ۔ عام آدمی پارٹی کا یہ پرزور مطالبہ ہے کہ بی جے پی کی کارپوریشن اور دہلی حکومت مرکزی حکومت سے فنڈز لائے ۔ کارپوریشن کو آسانی سے چلائیں اور مستقبل میں یہ بہانہ نہ بنائیں کہ رقم کی کمی کی وجہ سے ایم سی ڈی میں مختلف مقامات پر کچرا جمع ہو رہا ہے ۔