’ہر گھر ترنگا‘ مہم، جو آزادی کا امرت مہوتسو کے تحت شروع کی گئی، کا مقصد بھارت کی آزادی اور ترنگے کے اتحاد انگیز جذبے کا جشن منانا ہے۔ مگر جموں و کشمیر میں اس مہم کی اہمیت محض جھنڈا لہرانے سے کہیں بڑھ کر ہے۔ یہ ایک ایسا پیغام ہے جو تبدیلی، وابستگی اور تاریخ کے نئے باب کو ظاہر کرتا ہے۔
کئی دہائیوں تک کشمیر کو دہشت گردی، علیحدگی پسندی اور بیگانگی کے زاویے سے دیکھا گیا۔ ترنگا بعض لوگوں کے لیے فخر کی مشترکہ علامت کے بجائے ایک متنازعہ سیاسی نشان سمجھا جاتا تھا۔ عوامی سطح پر جھنڈا لہرانے کے پروگرام اکثر احتجاجات، بائیکاٹ اور سکیورٹی خدشات سے جڑے رہتے تھے۔ لیکن ’ہر گھر ترنگا‘ مہم اس بیانیے کو بدل رہی ہے۔
اس سال سری نگر کی مصروف مارکیٹوں سے لے کر کپواڑہ کے خاموش دیہات تک، زعفرانی، سفید اور سبز رنگوں سے سجا ترنگا گھروں، اسکولوں، سرکاری عمارتوں اور دکانوں پر لہراتا نظر آیا۔ بچوں نے ریلیوں میں شرکت کی، قومی نغمے گائے، خاندانوں نے فخر سے جھنڈے کے ساتھ تصویریں بنوائیں، اور مقامی کاریگروں نے کپڑے کے ترنگے تیار کیے جو چند دنوں میں ہی فروخت ہوگئے۔ اب ترنگے کی موجودگی محض سرکاری ہدایت نہیں بلکہ عوامی شمولیت کا نتیجہ ہے۔
قومی پرچم محض کپڑے کا ٹکڑا نہیں بلکہ ایک قوم کی روح اور پہچان کا مجسمہ ہے۔ یہ ہمارے ماضی کی قربانیوں، حال کی ذمہ داریوں اور مستقبل کی اْمیدوں کا رنگین عکس ہے۔ اس کے رنگ اور ڈیزائن ہر شہری کو یاد دلاتے ہیں کہ ہم سب ایک ہی شناخت اور ایک ہی مقصد کے حصے دار ہیں۔ جب یہ پرچم لہراتا ہے تو دلوں میں فخر، یکجہتی اور خدمتِ وطن کا جذبہ جاگ اْٹھتا ہے، اور دنیا کو یہ پیغام جاتا ہے کہ یہ قوم متحد، خودمختار اور پرعزم ہے۔
اس کی علامتی اہمیت بے حد گہری ہے۔ جب شوپیاں یا بارہمولہ میں کوئی خاندان اپنے گھر پر قومی پرچم لہراتا ہے تو یہ پیغام محض ان کی چھت سے آگے جاتا ہے۔ یہ بڑھتی ہوئی سلامتی، خوف پر مبنی سیاست کے زوال اور قومی یکجہتی کے تدریجی قبولِ عام کی نشاندہی کرتا ہے۔ یہ ان لوگوں کو بھی خراجِ عقیدت ہے جنہوں نے اس خطے میں امن و سکون کے لیے قربانیاں دیں۔
’ہر گھر ترنگا‘ مہم ایک سرکاری پروگرام سے بڑھ کر ایک سماجی تحریک بنتی جا رہی ہے جو طلبہ، دکانداروں، سرکاری اہلکاروں اور دیہاتیوں کو ایک ساتھ لا کر وابستگی کا اظہار کر رہی ہے۔ اس کی اصل کامیابی جبر میں نہیں بلکہ عوام کی رضامندی میں ہے،ترنگے کو ایک مشترکہ ثقافتی سرمایہ بنانے میں، نہ کہ محض سیاسی تقسیم کی لکیر۔
امسال وادی میں’ہر گھر ترنگا‘ کی سب سے بڑی تقریب منگل کی صبح سرینگر میں ڈل جھیل کے علاقے میں ہوئی جس میں ہزاروں لوگوں نے شرکت کی جن کے ہاتھوں میں اپنی پوری آن ‘ بان اور شان کے ساتھ ترنگا لہرا رہا تھا ۔ اس تقریب میں لیفٹیننٹ گورنر منوج سنہا کے علاوہ وزیر اعلیٰ عمرعبداللہ نے بھی شرکت کی ۔
سنہا نے اس موقع پر خطاب میں کہا ’’ترنگا میرا دھرم ہے۔ ترنگا میری طاقت ہے۔ ترنگا میرے دل کی دھڑکن ہے‘‘۔انہوں نے یہ بھی کہا کہ پچھلے پانچ سالوں سے ترنگا یاترا کے لیے جوش و خروش میں اضافہ ہوا ہے۔انہوں نے کہا کہ ترنگا یاترا کی خاص اہمیت ہے کیونکہ یہ وکشت بھارت (ترقی یافتہ ہندوستان) کے وڑن سے ہم آہنگ ہے۔ان کاکہنا تھا’’۲؍اگست سے ، ہم نے ہر گھر ترنگا مہم شروع کی ، اور جموں و کشمیر کے نوجوانوں میں جو توانائی ہم نے دیکھی وہ متاثر کن تھی۔ ہم نے ترنگا کے لیے جینے اور خوشی خوشی اس کی عزت کے لیے اپنی جانیں قربان کرنے کا عزم کیا ہے‘‘۔
وزیر اعلیٰ‘ عمرعبداللہ کاکہنا تھا کہ ہمیں قومی پرچم کو مزید بلندیوں تک لے جانے کی کوشش کرنی چاہیے اور ان لوگوں کے نقش قدم پر چلنا چاہیے جنہوں نے اس پرچم کے احترام کو برقرار رکھنے کے لیے عظیم قربانیاں دی ہیں۔ انہوں نے کہاکچھ سال پہلے ، قومی پرچم صرف سرکاری عمارتوں اور نامزد سرکاری تقریبات پر لہرایا جا سکتا تھا۔ تاہم ، یہ ایک شخص تھا جس نے اپنے احاطے میں قومی پرچم لہرانے کا حق حاصل کرنے کیلئے عدالتوں کے دروازے کھٹکھٹائے۔ اس نے حکومت کو قانون تبدیل کرنے پر مجبور کیا اور اب ہم ہر گھر پر ترنگا لہرا سکتے ہیں۔‘‘
ہر گھر ترنگا کی شاندار تقریبات، طلبہ و عوام کی رضا کارانہ شمولیت اور دیہی سطح پر قوم پرستی محسوس ہو رہی ہے‘یہ سب یہ بتاتا ہے کہ کشمیر نیا عوامی تعلق اور قومی شناخت محسوس کر رہا ہے۔ترنگا اب صرف ایک سیاسی نشان نہیں رہا، بلکہ لوگ اسے فخر، ماحول اور اجتماعی شعور کے اظہار کے طور پر غیر محسوس طور پر اپنا رہے ہیں۔ایسی سرگرمیوں نے کشمیری نوجوانوں میں خود اعتمادی، قومی اتحاد، اور ترقیاتی جذبہ جگایا‘جو کہ ایک ہم عصر امن کی حکمت عملی کا حصہ ہیں۔
جیسے جیسے کشمیر معمول کی زندگی، ترقی اور خوشحالی کی جانب بڑھ رہا ہے، ہر گھر پر لہراتا جھنڈا وادی اور ملک کے باقی حصوں کے درمیان رشتوں کو مضبوط کرنے میں مدد دے گا۔ اس اعتبار سے، ہر لہراتا ہوا ترنگا امن، اتحاد اور ایک پرامید مستقبل کے لیے ایک خاموش مگر گہری رائے ہے۔
کشمیر میں ہر گھر ترنگا مہم نہ صرف ایک علامتی جشن بلکہ ایک حقیقی سماجی انقلاب ہے، جو نفسیاتی تقسیم کو کم کر کے قومی اتحاد اور ترقی کی بنیاد رکھ رہی ہے۔ یہ مہم صرف جھنڈا لہرانے کی نہیں بلکہ اْمید، امن اور تبدیلی کی نمائندہ بن چکی ہے۔
