سرینگر//
جموں کشمیر پولیس نے جنوبی کشمیر کے ضلع اننت ناگ میں ایک ملزم کو جعلی سونا بیچنے کے الزام میں پبلک سیفٹی ایکٹ (پی ایس اے ) کے تحت حراست میں لیا ہے ۔
ایک پولیس ترجمان نے بتایا کہ پولیس اسٹیشن بجبہاڑہ کو شوکت احمد زرگر ولد نور محمد زرگر ساکن نیو کالونی بجبہاڑہ حال شمسی پورہ اننت ناگ کے بارے میں گذشتہ کچھ برسوں سے مسلسل شکایتیں موصول ہو رہی تھیں کہ وہ جعلی سونا بیچنے کا کام کر رہا ہے ۔
ترجمان نے کہا کہ۱۱جنوری۲۰۲۳کو شبیر احمد وانی ساکن آلوچی باغ سری نگر کی طرف سے ایک تحریری شکایت موصول ہوئی جس میں الزام لگایا گیا کہ مذکورہ ملزم نے اس کو جعلی سونا فروخت کیا ہے جس پر متعلقہ دفعات کے تحت ایک کیس درج کیا گیا۔
ان کا کہنا تھا کہ۱۷؍اکتوبر ۲۰۲۴کو ارشاد احمد گنائی ساکن نانر ترال کی طرف سے ایک اور شکایت موصول ہوئی جس پر ایک اور مقدمہ درج کیا گیا۔
بیان میں کہا گیا کہ بعد ازاں۲۳؍اور۲۴جولائی۲۰۲۵کو نگینہ اختر ساکن جبلی پورہ اور زمرودہ ساکن مٹن کی طرف سے مزید دو شکایتیں موصول ہوئیں جن پر مقدمے درج کئے گئے ۔
ترجمان نے کہا کہ تحقیقات کے دوران شکایت کنندگان کی طرف سے پیش کئے گئے جعلی سونے کی چیزوں کو ضبط کیا گیا اور اصلیت تصدیق کرنے کیلئے ان کو ہال مارکنگ سینٹر سری نگر بھیج دیا گیا۔
ان کا کہنا تھا کہ تحقیقات سے یہ بات سامنے آئی کہ ملزم ایک دھوکہ باز ہے اور وہ لوگوں کو دھوکہ دے رہا ہے جو عوامی اعتماد اور یونین ٹریٹری کے لئے خطرہ ہے ۔
پولیس ترجمان نے بتایا کہ اس کی مسلسل مجرمانہ سرگرمیوں اور سماج کو در پیش خطرے کو مد نظر رکھتے ہوئے شوکت احمد زرگر کو پبلک سیفٹی ایکٹ کے تحت حراست میں لیا گیا اور اس کو کوٹ بلوال جیل جموں منتقل کیا گیا۔
