ایجنسیز
لہیہ//
یونین ٹیریٹری لداخ کے نئے لیفٹیننٹ گورنر کویندر گپتا نے جمعے کے روز اپنے عہدے کا باضابطہ طور پر چارج سنبھال لیا۔
گپتا نے اپنے خطاب میں اس عزم کا اظہار کیا کہ وہ عوامی تعاون سے لداخ کی تعمیر و ترقی کو ممکن بنائیں گے اور اسے عالمی سطح پر ایک ممتاز سیاحتی مقام کے طور پر تسلیم کرائیں گے ۔
گپتا کو لداخ میں لیفٹیننٹ گورنر کے عہدے کا حلف جموں و کشمیر اور لداخ ہائی کورٹ کے چیف جسٹس جسٹس ارون پالی نے راج نواس میں منعقدہ ایک باوقار تقریب کے دوران دلایا۔
اس موقع پر میڈیا سے بات کرتے ہوئے کویندر گپتا نے کہا’’مجھے لداخ کا لیفٹیننٹ گورنر مقرر کیا گیا ہے ۔ میں لداخ کے عوام کو یقین دلانا چاہتا ہوں کہ ہم مذہب، ذات پات اور سیاست سے بالاتر ہوکر سب مل کر ایک نئے لداخ کے خواب کو شرمندہ تعمیر کریں گے ‘‘۔
انہوں نے اس بات پر افسوس ظاہر کیا کہ ماضی میں لداخ کے ساتھ امتیازی سلوک روا رکھا گیا۔یہ ایک ناقابلِ تردید حقیقت ہے کہ لداخ کے ساتھ برسوں سے ناانصافی اور نظراندازی ہوتی رہی ہے ، لیکن اب ہمیں اس سے آگے بڑھ کر عملی اقدامات کرنے ہیں۔
گپتا، جو اس سے قبل جموں و کشمیر اسمبلی کے اسپیکر اور نائب وزیر اعلیٰ جیسے کلیدی عہدوں پر فائز رہ چکے ہیں، نے واضح کیا کہ ان کی اولین ترجیح لداخ کو سیاحت، بنیادی ڈھانچے ، اور روزگار کے مواقع کے لحاظ سے ترقی دینا ہے ۔
ان کا مزید کہنا تھا کہ ہم لداخ کو اُس سطح پر لے جانا چاہتے ہیں جہاں اس کا نام عالمی سیاحتی مراکز جیسے کہ سوئٹزرلینڈ، مالدیپ کے ساتھ لیا جائے ۔ ہماری سرزمین میں وہ تمام قدرتی خوبصورتی، ثقافت اور تنوع موجود ہے جو کسی بھی عالمی سیاحتی مقام کو درکار ہوتا ہے ۔
لداخ کے نو منتخب ایل جی نے کہا کہ حکومت عوامی رائے ، بلدیاتی اداروں، طلبہ، کسانوں، خواتین، اور نوجوانوں کی مشاورت سے ایک جامع ترقیاتی خاکہ تیار کرے گی تاکہ لداخ کو ہر لحاظ سے خود کفیل اور خوشحال بنایا جا سکے ۔
حلف برداری کی تقریب میں سابق ایم ایل اے وکرم رندھاوا سمیت متعدد سیاسی اور سول سوسائٹی شخصیات نے شرکت کی۔
گپتا نے بریگیڈیئر (ریٹائرڈ) ڈاکٹر بی ڈی مشرا کی جگہ لی جنہیں فروری۲۰۲۳میں لداخ یونین ٹریٹری کے لیفٹیننٹ گورنرکے طور پر مقرر کیا گیا تھا۔
لداخ کو سال۲۰۱۹میں سابقہ ریاست جموں و کشمیر سے الگ کیا گیا تھا۔موصوف نو منتخب لیفٹیننٹ گورنر نے میڈیا کو بتایا’’میں صدر جمہوریہ درو پدی مرمو اور وزیر اعظم نریندر مودی کا مشکور ہوں کہ انہوں نے مجھے یہ موقع فراہم کیا‘‘۔
گپتا نے کہا’’میں عوام کو یقین دلانا چاہتا ہوں کہ ہم مذمب و ذات پات اور سیاسی وابستگی سے قطع نظر مل کر لداخ یونین ٹریٹری کی تعمیر ترقی کیلئے کام کریں گے‘‘۔
ان کا کہنا تھا’’گذشتہ دور میں لداخ کے ساتھ بھید بھائو ہوا ہے لیکن ہم لداخ کو اس مقام پہنچائیں گے جہاں دنیا کے سیاحتی نقشے پر سب سے پہلے لداخ کا نام آئے گا‘‘۔
گپتا نے۲۰۱۸میں بی جے پی اور پی ڈی پی مخلوط حکومت میں نائب وزیر اعلیٰ کے طور پر خدمات انجام دیں۔ وہ جموں و کشمیر قانون ساز اسمبلی کے اسپیکر اور جموں کے میئر کے طور پر بھی خدمات انجام دے چکے ہیں۔وہ پہلی بار سال۲۰۱۴میں گاندھی نگر سے رکن اسمبلی منتخب ہوئے تھے ، انہوں نے کانگریس لیڈر رمن بھلا کو شکست دی تھی۔
