سرینگر//
اینٹی کرپشن بیورو نے بڈگام کے ہمچھی پورہ علاقے میں تعینات پٹواری طاہر جان ملہ کو رشوت لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
بیورو کے ترجمان کے مطابق شکایت کنندہ نے تحریری طور پر اطلاع دی تھی کہ پٹواری نے دو مختلف سیل ڈیڈز پر اراضی کے انتقال کے عمل کے لیے فی معاملہ دو ہزار روپے رشوت کا مطالبہ کیا تھا۔ یہ زمینیں عالم ناگ کھاگ علاقے میں واقع ہیں اور انتقال آن لائن سسٹم کے ذریعے ہونا تھا۔
شکایت کی جانچ پڑتال کے بعد الزامات کی تصدیق ہوئی، جس کے فوراً بعد اے سی بی سرینگر تھانے میں ایف آئی آر نمبر۲۰۲۵/۱۴دفعہ۷؍انسدادِ بدعنوانی ایکٹ ۱۹۸۸کے تحت مقدمہ درج کیا گیا۔
تحقیقات کے دوران بیورو نے ایک ٹریپ ٹیم تشکیل دی، جس نے باقاعدہ منصوبہ بندی کے تحت طاہر جان ملہ کو رشوت لیتے ہوئے موقع پر ہی دھر لیا۔
ذرائع کے مطابق گرفتاری کے وقت ملزم کے قبضے سے رشوت کی رقم برآمد کی گئی اور ضروری طبی و قانونی کارروائی کے بعد اسے حراست میں لے لیا گیا۔
اینٹی کرپشن بیورو نے عوام سے اپیل کی ہے کہ وہ بدعنوانی کے خلاف آواز بلند کریں اور ایسے واقعات کی اطلاع بلاخوف ادارے کو دیں تاکہ سرکاری نظام میں شفافیت اور احتساب کو یقینی بنایا جا سکے ۔
