سرینگر//
وسطی کشمیر کے ضلع بڈگام کے چاڈورہ علاقے میں ہفتے کی سہ پہر اچانک بھڑکی آگ نے تباہی مچادی، جس کے نتیجے میں تین رہائشی مکانات اور ایک گاوخانہ خاکستر ہوگئے جبکہ آگ پر قابو پانے کی کارروائی کے دوران دو فائر اہلکار زخمی ہو گئے ۔
فائر اینڈ ایمرجنسی سروسز کے ایک سینئر افسر نے یو این آئی کو بتایا کہ چاڈورہ کے سرسیار علاقے میں سہ پہر کے وقت آگ لگنے کی اطلاع موصول ہوتے ہی فائر ٹینڈرز اور عملہ موقع پر روانہ کیا گیا۔ تاہم، آگ نے انتہائی تیزی کے ساتھ تین گھروں اور ایک گاوخانے کو اپنی لپیٹ میں لے لیا۔
افسر کے مطابق، فائر بریگیڈ اہلکاروں نے بھرپور کوششوں سے آگ پر قابو پایا، تاہم اس کارروائی کے دوران دو فائر مین زخمی ہوگئے جنہیں فوری طور پر نزدیکی اسپتال منتقل کیا گیا جہاں ان کا علاج جاری ہے ۔
ادھر پولیس نے واقعے کا نوٹس لیتے ہوئے آگ لگنے کی وجوہات کا پتہ لگانے کے لیے مقدمہ درج کر کے تحقیقات شروع کر دی ہیں۔
علاقے میں اس واقعے کے بعد افسوس اور تشویش کی لہر دوڑ گئی ہے جبکہ متاثرہ خاندانوں کو فوری امداد فراہم کرنے کی مانگ کی جا رہی ہے ۔ ضلعی انتظامیہ سے توقع کی جا رہی ہے کہ وہ متاثرین کی ہر ممکن مدد کرے گی۔
