ہندوستان کی انڈر-20 خواتین کی فٹبال ٹیم کل ازبکستان کے خلاف پہلا دوستانہ میچ کھیلے گی

تاشقند// ہندوستان کی انڈر-20 خواتین کی فٹبال ٹیم اتوار کو ازبکستان کے خلاف اپنا پہلا دوستانہ میچ کھیلے گی۔
ہندوستانی ٹیم ازبکستان کے ساتھ دو دوستانہ میچ کھیلے گی۔ پہلا میچ 13 جولائی کو ڈو’ سٹلیک اسٹیڈیم میں ہندوستانی وقت کے مطابق رات ساڑھے آٹھ بجے کھیلا جائے گا۔ بنگلورو کے پادو کون-دراوڈ سینٹر فار اسپورٹس ایکسیلنس میں تربیت کے بعد ٹیم انڈیاجمعہ کی صبح ازبکستان کے دارالحکومت پہنچی اور شام کو جم میں پریکٹس کی۔ کل کے میچ سے قبل آج شام ٹیم نے فٹبال گراؤنڈ میں بھی مشق کی۔
یہ دوستانہ میچ ہندوستانی ٹیم کے لیے اگلے ماہ ہونے والے اے ایف سی انڈر-20 ویمن ایشیا کپ کوالیفائرز کی تیاری کا حصہ ہیں۔ کوالیفائرز میں ہندوستان کا مقابلہ انڈونیشیا، ترکمانستان اور میزبان میانمار سے ہوگا۔
ہندوستانی ٹیم کے ہیڈ کوچ جوآکیم الیگزینڈرسن نے کہا، "ہم ایک مضبوط حریف کے خلاف کھیلنا چاہتے تھے تاکہ ہمیں اندازہ ہو سکے کہ ایشیائی کوالیفائرز میں ہماری تیاری کہاں کھڑی ہے۔ ہم یہ بھی جانچنا چاہتے ہیں کہ کھلاڑی ایسے مقابلوں میں اپنی ذمہ داریاں کس طرح نبھاتے ہیں، خاص طور پر جب ہم کوالیفائر کے لیے حتمی ٹیم کی تشکیل کے قریب ہیں۔ اس سے نہ صرف ہمیں میدان پر تجربہ حاصل ہوگا بلکہ سفر اور مختلف حالات میں ڈھلنے کا موقع بھی ملے گا۔”
انہوں نے مزید کہا، "تاشقند کا موسم اس وقت بنگلورو جیسا ہی ہے، اس لیے اس حوالے سے کوئی مسئلہ نہیں ہے۔ ہوٹل، رہائش اور کھانے کا انتظام بھی بہتر ہے۔”
ہندوستان کی ٹیم 24 کھلاڑیوں کے ساتھ آئی تھی، لیکن آخری لمحے میں ایک تبدیلی کی گئی۔ میلوڈی چانو کیشام کی طبیعت خراب ہونے کے باعث انیکا دیوی شاروبم کو گول کیپر مقرر کیا گیا ہے۔
ازبکستان انڈر-20 کی 23 رکنی ٹیم میں چار ایسی کھلاڑی شامل ہیں جو مئی میں ہندوستان کے خلاف دو فیفا دوستانہ میچوں کے لیے سینئر ٹیم کے ساتھ بنگلورو آئی تھیں۔