آپریشن سندور:نیا ہندوستان اب دہشت گردی کا شکار نہیں ہوگا: راج ناتھ

ادھم پور//
وزیر دفاع راج ناتھ سنگھ نے جمعہ کو کہا کہ آپریشن سندور اس بات کا ثبوت ہے کہ نیا ہندوستان ثابت قدم ، پرعزم ہے اور اب دہشت گردی کا شکار نہیں ہوگا۔
سنگھ ، جو جمعہ کو دو روزہ دورے پر یہاں پہنچے تھے ، ہفتہ کو یوگا کے عالمی دن کی تقریبات میں شرکت کریں گے ، اور ادھم پور چھاؤنی میں مسلح افواج کے اہلکاروں کے ساتھ بات چیت کریں گے۔
سنگھ نے یہاں شمالی کمان ہیڈ کوارٹر میں فوجیوں کے ساتھ بات چیت کرتے ہوئے کہا’’آپریشن سندور اس بات کا ثبوت ہے کہ نیا ہندوستان ثابت قدم ، پرعزم ہے اور اب دہشت گردی کا شکار نہیں ہوگا۔ یہ طاقت اور حکمت عملی کے ساتھ جواب دے گا ‘‘۔
وزیر دفاع نے کہا کہ بھارت اب دہشت گردی کو برداشت نہیں کرے گا اور اگر اس کے اتحاد اور سالمیت کو نقصان پہنچایا گیا تو اس کا منہ توڑ جواب دے گا۔ ’’آپریشن سندور ابھی ختم نہیں ہوا ہے۔ یہ صرف ایک وقفہ ہے۔ میں یہ بات اپنے پڑوسی ملک کو بتانا چاہتا ہوں‘‘۔
سنگھ نے کہا کہ دہشت گردی کے تئیں ہندوستان کی پالیسی میں تبدیلی ملک کے فوجیوں کی بے مثال بہادری اور لگن کا نتیجہ ہے ۔
وزیر دفاع نے پاکستان اور پاکستان کے زیر قبضہ جموں و کشمیر (پی او جے کے) میں دہشت گردی کے بنیادی ڈھانچے کو تباہ کرنے میں مسلح افواج اور انٹیلی جنس ایجنسیوں کی درستگی ، ہم آہنگی اور ہمت کی بھی تعریف کی اور کہا کہ دہشت گردی کے بارے میں ہندوستان کی پالیسی میں تبدیلی ان کی بے مثال بہادری اور لگن کا نتیجہ ہے۔
سنگھ نے آپریشن سندور کو صرف ایک فوجی کارروائی نہیں بلکہ سرحد پار دہشت گردوں اور ان کی حمایت کرنے والوں کے لیے ایک انتباہ قرار دیا۔
وزیر دفاع نے ایک فوجی کی زندگی کو ہمت اور قربانی سے بھرپور قرار دیتے ہوئے کہا کہ قوم مادر وطن کے لیے مسلح افواج کی خدمات کا ہمیشہ مقروض رہے گی۔
یوگا کے عالمی دن کے موقع پر مسلح افواج کے زیر اہتمام ایک اجتماعی دعوت ’بارکھانہ‘ میں ، وزیر دفاع نے فوج کے اہلکاروں پر زور دیا کہ وہ جسمانی اور ذہنی تندرستی پر توجہ مرکوز رکھیں ، اور فوجی کی زندگی میں طاقت اور تندرستی کی اہمیت کو اجاگر کریں۔
ان کاکہنا تھا’’اگر آپ مضبوط ہوں گے تو ہماری سرحدیں مضبوط ہوں گی۔ سنگھ نے کہا کہ جب سرحدیں مضبوط ہوں گی تو ہندوستان مضبوط ہوگا‘‘۔تقریب کے ایک حصے کے طور پر ایک ثقافتی پروگرام کا بھی اہتمام کیا گیا۔
اس سے پہلے مرکزی وزیردفاع راجناتھ سنگھ جمعے کے روز جموں و کشمیر کے ضلع اُدھم پور پہنچ گئے ، جہاں وہ کل یعنی ۲۱جون کو عالمی یومِ یوگا کی سرکاری تقریب میں شرکت کریں گے ۔
ان کا یہ دورہ نہ صرف یوگا کے فروغ سے متعلق ہے بلکہ دفاعی افسران و جوانوں کے ساتھ بات چیت اور حوصلہ افزائی کا اہم موقع بھی سمجھا جا رہا ہے ۔
سرکاری ذرائع کے مطابق وزیر دفاع کے ہمراہ اعلیٰ فوجی افسران، دفاعی وزارت کے سینئر حکام اور مقامی انتظامیہ کے نمائندے بھی موجود ہیں۔
راجناتھ سنگھ کل علی الصبح اُدھم پور کے نیشنل ڈیفنس اکیڈمی سینٹر میں منعقد ہونے والی مرکزی یوگا تقریب میں شامل ہوں گے ، جس میں بڑی تعداد میں فوجی اہلکار، افسران، مقامی اسکولوں کے طلباء اور شہری بھی حصہ لیں گے ۔
سرکاری ذرائع نے بتایا کہ راجناتھ سنگھ اپنے دورے کے دوران شمالی کمان کے ہیڈکوارٹرز کا بھی دورہ کریں گے اور وہاں تعینات اعلیٰ افسران سے سرحدی و اندرونی سلامتی کی تازہ صورتحال پر تبادلہ خیال کریں گے ۔ توقع ہے کہ وہ یوگا کی اہمیت، فوجیوں کی ذہنی اور جسمانی صحت پر اس کے اثرات، اور حکومت کی جانب سے یوگا کے فروغ کے اقدامات پر خطاب بھی کریں گے ۔
یاد رہے کہ عالمی یومِ یوگا ہر سال۲۱جون کو منایا جاتا ہے ، اور اس بار جموں و کشمیر کے اُدھم پور کو مرکزی تقریب کے لیے منتخب کرنا اس بات کی عکاسی کرتا ہے کہ حکومت ہند یوگا کو ہر خطے اور طبقے تک پہنچانے کے لیے پرعزم ہے ۔
علاقائی انتظامیہ نے تقریب کے لیے تمام تیاریاں مکمل کر لی ہیں، سیکورٹی کے سخت انتظامات کیے گئے ہیں، اور فوجی بینڈ، یوگا انسٹرکٹرز، اور مختلف اسکولوں کے طلبہ کی ریہرسل آج مکمل کی گئی۔
راجناتھ سنگھ کے اس دورے کو جموں و کشمیر میں قومی سطح پر صحت مند طرزِ زندگی کو فروغ دینے کی ایک اہم کوشش کے طور پر دیکھا جا رہا ہے ، اور عوامی سطح پر اس تقریب کے حوالے سے خاصا جوش و خروش پایا جا رہا ہے ۔