پونچھ میں محکمہ ریونیو کا اہلکار رشوت لیتے ہوئے گرفتار:اے سی بی

جموں//
اینٹی کورپشن بیورو (اے سی بی) نے جموں و کشمیر کے ضلع پونچھ میں محکمہ ریونیو کے ایک اہلکار (پٹواری) کو۵ہزار روپے کی رشوت لیتے ہوئے رنگے ہاتھوں گرفتار کیا۔
بیورو کے ایک ترجمان نے اپنے ایک بیان میں کہا’’اے سی بی کو ایک شکایت موصول ہوئی جس میں کہا گیا کہ شکایت کنندہ کو گاؤں دھارا میں واقع اپنی زمین کی کھسرہ گردواری کی تصدیق شدہ کاپیاں درکار تھیں‘‘۔
ترجمان نے کہا’’شکایت کے مطابق شکایت کنندہ نے اس کیلئے۲۶مئی۲۰۲۵کو آن لائن موڈ کے ذریعے درخواست دی تھی لیکن پٹواری محمد جمیل مبینہ طور پر تصدیق شدہ دستاویزات فراہم کرنے کیلئے رشوت کا مطالبہ کر رہا تھا‘‘۔
بیان میں کہا گیا’’چونکہ شکایت کنندہ رشوت نہیں دینا چاہتا تھا،اس نے اینٹی کرپشن بیورو کی طرف رجوع کیا اور پٹواری کے خلاف قانونی کارروائی کی درخواست کی‘‘۔
ترجمان نے کہا’’شکایت موصول ہونے پر ایک محتاط ویریفکیشن کی گئی، جس میں رشوت کے مطالبہ کی تصدیق ہوئی۔اسی مناسبت سے ، انسداد بدعنوانی ایکٹ ۱۹۸۸کی دفعہ ۷کے تحت ایف آئی آر نمبر۲۰۲۵/۰۲میں پولیس اسٹیشن اے سی بی راجوری میں مقدمہ درج کیا گیا اور تحقیقات کا آغاز کیا گیا‘‘۔
ترجمان نے بتایا کہ تحقیقات کے دوران ایک ٹریپ ٹیم کو تشکیل دیا گیا۔انہوں نے کہا’’ٹیم نے کامیاب جال بچھا کر پٹواری کو آزاد گواہوں کی موجودگی میں شکایت کنندہ سے رشوت لیتے ہوئے رنگے ہاتھوں پکڑ لیا‘‘۔
ان کا کہنا تھا کہ ملزم کو قانونی طریقہ کار کے بعد موقع پر ہی گرفتار کر لیا گیا۔بیان میں مزید کہا گیا کہ اس کے بعد پونچھ میں واقع ملزم کے رہائشی احاطے کی تلاشی لی گئی۔انہوں نے کہا کہ کیس کی مزید تفتیش جاری ہے ۔