آئندہ تین دنوں میں شدید گرمی کی پیش گوئی

۱۴سے۱۷جون کے دوران بارشوں کا امکان/گرمائی تعطیلات پر سنجیدگی سے غور کیا جارہاہے :وزیر تعلیم
سرینگر//
محکمہ موسمیات نے بدھ کے روز جموں و کشمیر میں اگلے تین دنوں کے دوران شدید گرمی کی لہر کی پیش گوئی کی ہے۔
محکمہ موسمیات کے ایک عہدیدار نے بتایا کہ ۱۳ جون تک جموں کشمیر میں موسمی حالات عام طور پر گرم اور خشک رہیں گے ، جبکہ اگلے ۳دنوں کے دوران جموں و کشمیر کے بکھرے ہوئے مقامات پر شدید گرمی کی لہر برقرار رہے گی۔
عہدیدار نے بتایا کہ ۱۳جون تک موسم عمومی طور پر گرم اور خشک رہے گا، جبکہ۱۴سے۱۷جون کے دوران کہیں کہیں ہلکی بارش اور گرج چمک کے ساتھ تیز ہوا چلنے کے امکانات ہیں۔ تاہم ۱۸سے۲۰ جون کے درمیان ایک بار پھر موسم گرم اور خشک رہنے کا امکان ہے ۔
محکمہ نے شدید گرمی کے پیش نظر ایک ایڈوائزری بھی جاری کی ہے جس میں عوام کو دن کے سب سے گرم اوقات (دوپہر ۱۲بجے سے شام۴بجے تک) غیر ضروری بیرونی سرگرمیوں سے پرہیز کرنے اور زیادہ سے زیادہ پانی پینے کا مشورہ دیا گیا ہے ۔ کسانوں کو اپنے زرعی کام جاری رکھنے کی اجازت دی گئی ہے ۔
موسم کی شدت اور وادی کے بیشتر اسکولوں میں ناکافی انتظامات کے پیش نظر والدین کا کہنا ہے کہ حکومت فوری طور پر اسکولوں کے لیے مختصر دورانیے کی تعطیلات کا اعلان کرے تاکہ بچوں کی صحت کو محفوظ رکھا جا سکے ۔
والدین کا کہنا ہے کہ طلبہ گرمی کی شدت سے نڈھال ہو رہے ہیں، کلاسز میں توجہ دینا ممکن نہیں رہا۔ کئی بچے بے ہوشی، تھکن اور گھبراہٹ کا شکار ہو رہے ہیں۔ حکومت کو فوری فیصلہ کرنا چاہیے ۔
ریاض احمد نامی ایک شہری نے یو این آئی کو بتایا کہایسے حالات میں اسکول جاری رکھنے کا کوئی جواز نہیں، جب بچے کلاس میں بھی گرمی سے پریشان ہوں اور واپسی پر شدید دھوپ کا سامنا کریں۔
واضح رہے کہ وادی میں جون کے آغاز سے ہی درجہ حرارت معمول سے کہیں زیادہ ریکارڈ کیا جا رہا ہے ، اور اسکولوں میں بنیادی سہولیات کی کمی کے باعث طلبہ کی صحت پر منفی اثرات مرتب ہو رہے ہیں۔
اس دوران وزیر تعلیم سکینہ ایتو نے بدھ کے روز کہا کہ وادی میں جاری شدید گرمی کی لہر کے پیش نظر حکومت اسکولوں کے لیے جلد تعطیلات کا اعلان کرنے پر سنجیدگی سے غور کر رہی ہے ۔
ایتو نے واضح کیا کہ محکمہ تعلیم موسمی حالات پر مسلسل نظر رکھے ہوئے ہے اور صورتحال کے مطابق فیصلہ لیا جائے گا۔
سرینگر میں نامہ نگاروں سے بات کرتے ہوئے ایتو نے کہا’’ محکمہ تعلیم موجودہ موسمی حالات کا بغور جائزہ لے رہا ہے ۔ اگر ہمیں محسوس ہوا کہ قبل از وقت تعطیلات دینا ضروری ہے ، تو ہم اس پر فیصلہ لیں گے ‘‘۔
وزیر تعلیم نے مزید کہا ’’ابھی صرف دو دن ہوئے ہیں جب گرمی کی شدت میں اضافہ ہوا ہے ۔ اگر یہ گرمی کی لہر برقرار رہی، تو حکومت جلد تعطیلات کے حوالے سے اقدام کرے گی‘‘۔
اس موقع پر وزیر موصوفہ نے کشمیر کی سیاحت سے متعلق بھی بات کی اور کہا’’کشمیر کی سیاحت دنیا بھر میں مشہور ہے ۔ ہم چاہتے ہیں کہ زیادہ سے زیادہ سیاح یہاں آئیں اور قدرتی حسن سے لطف اندوز ہوں۔ حکومت اس شعبے کو مزید فروغ دینے کے لیے پرعزم ہے ‘‘۔
ایک سوال کے جواب میں ایتو نے بتایا کہ ریاست میں ریزرویشن پالیسی پر غور کے لیے بنائی گئی کابینہ سب کمیٹی نے اپنی رپورٹ تیار کر لی ہے ، جو جلد کابینہ اجلاس میں پیش کی جائے گی۔
ایتو نے کہا کہ ریزرویشن کے حوالے سے چھ ماہ کی مدت میں رپورٹ مکمل کر لی گئی ہے ، اور اب یہ کابینہ میں پیش کی جائے گی جہاں اس پر مزید غور و خوض ہوگا۔