انگلینڈ کی خواتین ٹیم نے ویسٹ انڈیز کو 143 رن سے شکست دی

لیسٹر (انگلینڈ// ایمی جونز (129)، ٹمی بیومونٹ (106) کی سنچریوں اور ایما لیمب کی (55) نصف سنچری اننگز کے ساتھ ساتھ ایلس کیپسی (تین وکٹ)، لنسی اسمتھ اور لارین فائلر (دو ، دو)کی شاندار کارکردگی کی بدولت انگلینڈ کی خواتین ٹیم نے دوسرے ون ڈے میں ویسٹ انڈیز کو 143 رن سے شکست دے دی، اس کے ساتھ ہی انگلینڈ نے تین میچوں کی سیریز میں 2-0 کی ناقابل تسخیر برتری حاصل کر لی ہے۔
بدھ کی شب لیسٹر کے گریس روڈ اسٹیڈیم میں کھیلے گئے میچ میں انگلینڈ کی خواتین ٹیم نے ٹاس جیت کر پہلے بیٹنگ کا فیصلہ کیا۔ انگلینڈ کی اوپننگ جوڑی ایمی جونز اور ٹیمی بیومونٹ نے شاندار آغاز کیا اور پہلی وکٹ کے لیے 202 رن جوڑے۔ 30ویں اوور میں کرشمہ رامہرک نے ایمی جونز کو آؤٹ کر کے اس شراکت کو توڑا۔ ایمی جونز نے 98 گیندوں پر 20 چوکوں کی مدد سے (129) رن کی اننگز کھیلی۔ اس کے بعد رامہرک نے 40ویں اوور میں ٹیمی بیومونٹ کو آؤٹ کر کے اپنی اور ٹیم کی دوسری وکٹ حاصل کی۔ ٹیمی بیومونٹ نے 109 گیندوں میں 12 چوکوں اور ایک چھکے کی مدد سے (106) رن بنائے۔ کپتان نیٹ سائبر برنٹ (12)، ایما لیمب (55)، صوفیہ ڈنکلے (31) اور ایلس کیپسی (16) رن کی بدولت انگلینڈ نے مقررہ 50 اووروں میں چھ وکٹ پر 366 رن کا بڑا اسکور بنایا۔ ویسٹ انڈیز کی جانب سے کرشمہ رامہرک اور عالیہ ایلن نے دو دو وکٹیں حاصل کیں۔ ایفی فلیچر اور جینیلیا گلاسگو نے ایک ایک بلے باز کو آؤٹ کیا۔
367 رن کے ہدف کے تعاقب میں ویسٹ انڈیز کا آغاز اچھا نہیں رہا اور 61 کے اسکور پر اس کی دو وکٹیں گر گئیں۔جائیڈا جیمز (چھ) اور کپتان شمائن کیمبل (19) رن بنانے کے بعد آؤٹ ہوئیں۔ اس کے بعد انگلینڈ کے باؤلنگ اٹیک کے سامنے ویسٹ انڈیز کی وکٹیں وقفے وقفے سے گرتی رہیں۔ ریلیانا گریمونڈ (55)، اسٹیفنی ٹیلر (20)، جینیلیا گلاسگو (44)، شبیکا گجنبی (آٹھ)، عالیہ ایلن (صفر)، جہزارا کلاکسٹن (18)، ایفی فلیچر (آٹھ) اور چیری فریزر (18) رن بنانے کے بعد آؤٹ ہوئیں۔ انگلینڈ کے گیند بازوں نے ویسٹ انڈیز کی پوری ٹیم کو 45.4 اووروں میں 223 رن تک محدود کر دیا اور میچ 143 رن سے جیت لیا۔ کرشمہ رامہرک 15 رن بنانے کے بعد ناٹ آؤٹ رہیں۔
انگلینڈ کی جانب سے ایلس کیپسی نے تین وکٹیں حاصل کیں۔ لنسی اسمتھ اور لارین فائلر نے دو دو وکٹیں حاصل کیں۔ لارین بیل، کیٹ کراس اور ایلس ڈیوڈسن-رچرڈز نے ایک ایک بلے باز کو آؤٹ کیا۔