ایل جی سنہا کا راجوری میں سیکورٹی صورتحال کا جائزہ

جموں//
جموںکشمیر کے لیفٹیننٹ گورنر‘ منوج سنہا نے بدھ کے روز راجوری کے نوشہرہ سیکٹر کا دورہ کیا جہاں انہوں نے لائن آف کنٹرول (ایل او سی) پر تعینات فوجی جوانوں سے ملاقات کی اور موجودہ سیکورٹی صورتحال کا جائزہ لیا۔
لیفٹیننٹ گورنر نے نوشہرہ میں اگلی چوکیوں اور سیکورٹی تنصیبات کا معائنہ کیا اور وہاں تعینات افواج کے حوصلے ، پیشہ ورانہ تیاریوں اور قربانیوں کو سراہا۔ انہوں نے فوجی اہلکاروں سے بات چیت کرتے ہوئے ان کی خدمات کو قوم کی سلامتی کی ضامن قرار دیا اور ان کے بلند حوصلے اور فرض شناسی پر خراجِ تحسین پیش کیا۔
سنہا نے افواج کے اعلیٰ افسران سے بات کرتے ہوئے سرحدی علاقوں میں سیکیورٹی کے مجموعی حالات، دراندازی کی کوششوں، دہشت گردی کے خلاف آپریشنز اور عوام کے تحفظ کے لیے جاری اقدامات پر بریفنگ لی۔ انہوں نے کہا کہ سیکورٹی فورسز کی مستعدی اور قربانیوں کی بدولت ہی جموں و کشمیر میں امن کا ماحول قائم ہو رہا ہے ۔
لیفٹیننٹ گورنر نے نوجوان سپاہیوں کے ساتھ کھلے ماحول میں تبادلہ خیال کیا اور ان کے مسائل، ضروریات اور فلاحی اقدامات کے بارے میں بھی معلومات حاصل کیں۔ انہوں نے یقین دلایا کہ حکومت ان کے تمام ضروریات کو ترجیحی بنیادوں پر پورا کرے گی۔
سنہا نے اپنے خطاب میں کہا’’سرحدی علاقوں میں تعینات ہمارے فوجی جوان حقیقی معنوں میں قومی محافظ ہیں۔ ان کی قربانیوں کو قوم ہمیشہ یاد رکھے گی۔ ‘‘
دریں اثنا کشمیر زون کے انسپکٹر جنرل آف پولیس (آئی جی پی) وی کے بردی نے آج پولیس کنٹرول روم میں ایک اعلیٰ سطحی سکیورٹی جائزہ اجلاس کی صدارت کی، جس میں شری امرناتھ یاترا۲۰۲۵، محرم الحرام اور دیگر اہم تقریبات کے پیش نظر سیکیورٹی انتظامات کا تفصیل سے جائزہ لیا گیا۔
اجلاس کے آغاز پر تمام افسران نے آئی جی پی کو اپنے اپنے اضلاع میں مجوزہ سیکیورٹی پلان سے آگاہ کیا اور بتایا کہ شری امرناتھ جی یاترا، محرم اور دیگر اہم مواقع کے دوران امن و امان کی فضا قائم رکھنے کے لیے مربوط اور ہم آہنگ حکمت عملی تیار کی گئی ہے ۔
افسران نے پچھلے برسوں کے تجربات کو مدنظر رکھتے ہوئے جدید نگرانی کے نظام، موثر رابطہ کاری، اور مستعد عملے کی تعیناتی کو اولین ترجیح دینے پر زور دیا۔
آئی جی پی کشمیر نے اجلاس سے خطاب کرتے ہوئے تمام سکیورٹی انتظامات کا باریک بینی سے جائزہ لیا۔ انہوں نے ہدایت دی کہ تمام حساس اور اہم مقامات پر سی سی ٹی وی کیمروں کی تنصیب یقینی بنائی جائے تاکہ کسی بھی ممکنہ خطرے کی بروقت نگرانی اور روک تھام کی جا سکے ۔ انہوں نے تمام کیمپوں اور حساس علاقوں میں مناسب تعداد میں فورسز کی تعیناتی کو یقینی بنانے پر زور دیا۔
آئی جی پی نے انٹیلی جنس پر مبنی کارروائیوں، بروقت خطرے کی تشخیص اور پیشگی اقدامات کی اہمیت کو اجاگر کرتے ہوئے کہا کہ تمام افسران کو چاہیے کہ وہ زمینی سطح پر قریبی رابطہ رکھیں تاکہ امن کو ہر صورت برقرار رکھا جا سکے ۔
اجلاس کا اختتام اس عزم کے ساتھ ہوا کہ تمام متعلقہ افسران اور ادارے آئندہ تقریبات کو پُرامن اور خوش اسلوبی سے منعقد کرنے کے لیے بھرپور تعاون اور ہم آہنگی کے ساتھ کام کریں گے ۔
اجلاس میں ڈپٹی انسپکٹر جنرل وسطی کشمیر رینج راجیو پانڈے ، ڈی آئی جی شمالی کشمیر مقصود الزمان، ڈی آئی جی جنوبی کشمیر جاوید اقبال میٹو، ایس ایس پی پی سی آر کشمیر، تمام اضلاع کے سینئر سپرنٹنڈنٹس آف پولیس (ایس ایس پیز) اور دیگر اعلیٰ افسران نے شرکت کی۔