حکومت صورتحال کے مستحکم ہونے کا انتظار کریگی تاکہ سیاحت کے شعبے کی بحالی پر کام کیا جا سکے:وزیر اعلیٰ
سرینگر//
جموں کشمیر کے وزیر اعلیٰ عمر عبداللہ نے منگل کو کہا کہ آئندہ کھیر بھوانی میلے اور امرناتھ یاترا کے محفوظ اور ہموار انعقاد کو یقینی بنانے کیلئے تمام انتظامات کیے جائیں گے۔
عمرعبداللہ نے گاندربل کا دورہ کیااورکھیر بھوانی کے مندر میں عقیدت پیش کیا۔
بعد ازاں ذرائع ابلاغ کے نمائندوں سے گفتگو میں وزیر اعلیٰ نے کہا’’ہم نے یاترا کی تیاری شروع کر دی ہے۔ جہاں تک سکیورٹی کا تعلق ہے، تمام انتظامات کیے جائیں گے۔ یہ ہماری کوشش ہوگی کہ پہلے ایک کامیاب ماتا کھیر بھوانی میلہ منعقد ہو، اور پھر دونوں راستوں سونہ مرگ اور پہلگام کے ذریعے امرناتھ یاترا ہو۔ ہم چاہتے ہیں کہ تمام یاتری محفوظ واپس لوٹیں‘‘۔
میلہ کھیربھوانی‘کشمیری پنڈتوں کیلئے ایک اہم مذہبی واقعہ، ممکنہ طور پر جون کے پہلے ہفتے میں منایا جائے گا۔ کشمیری پنڈت ملک کے تمام حصوں سے راگنیا دیوی کے مندر پر جمع ہوتے ہیں۔
سالانہ امرناتھ یاترا ۳جولائی کو شروع ہوگی۔پہلگام کے حملے کے سیاحت پر اثرات کے بارے میں پوچھنے پر، وزیر اعلیٰ نے کہا کہ حکومت صورتحال کے مستحکم ہونے کا انتظار کرے گی اس سے پہلے کہ سیاحت کے شعبے کی بحالی پر کام کیا جا سکے۔
عمرعبداللہ نے کہا’’یہ متاثر ہوا ہے، لیکن فی الحال، ہم اس کے بارے میں کچھ نہیں کر رہے ہیں۔ پہلے صورت حال کو مستحکم ہونے دیں، پھر ہم اسٹیک ہولڈرز کے ساتھ بیٹھیں گے اور پروگرام کے تحت سیاحت کو بحال کرنے کے اقدامات کریں گے۔اچھی بات یہ ہے کہ جموںکشمیر کے باہر کے ٹور آپریٹرز بھی چاہتے ہیں کہ یہ بحال ہو۔ کچھ گروہ آنا شروع ہو چکے ہیں۔ لیکن یاترا کو خوش اسلوبی سے گزرنے دیں، پھر ہم سیاحت پر توجہ مرکوز کریں گے۔
گزشتہ ماہ ۲۲؍اپریل کو پہلگام کے بائسرن علاقے میں ایک دہشت گردانہ حملے میں ۲۵سیاحوں سمیت ۲۶؍افراد کی ہلاکت کے بعد وادی میں سیاحوں کی آمد میں نمایاں کمی درج کی گئی ہے ۔
کشمیر میں سیاحتی سیکٹر سے جڑے افراد کاکہنا ہے کہ بیشتر بکنگز منسوخ کی گئی ہے جبکہ لوگوں میں اس واقعہ کے بعد خوف و ڈر کو دور کرنے میں وقت لگے گا۔
وزیر اعلیٰ نے گاندربل میں متعدد ترقیاتی منصوبوں کا افتتاح بھی کیا۔
اس ضمن میں ایکس پر ایک پوسٹ میں وزیرا علیٰ نے کہا ’’گاندربل میں باکورا میں پانی کی فراہمی کے منصوبے کا افتتاح کرتے ہوئے خوشی محسوس کر رہا ہوں ۔ یہ ایک اہم پروجیکٹ ہے جو ۴۰۰۰ سے زیادہ لوگوں کے لیے صاف اور قابل اعتماد پینے کے پانی کو یقینی بنائے گا۔ اس اہم قدم پر عزت مآب وزراء سکینہ ایتو‘جاوید رانا اور میشر ناصر اسلم وانی کے ساتھ شامل ہوا۔ یہ ہماری حکومت کے بنیادی سہولیات اور سب کی زندگی کے معیار میں بہتری کی عزم کی عکاسی کرتا ہے‘‘۔
عمرعبداللہ نے گاندربل میں پاندچھ میں ایک’اولڈ ایج ہوم‘ کا افتتاح کیا اور اسے’’ہمارے بزرگ شہریوں کے لئے عزت اور دیکھ بھال کو یقینی بنانے کی جانب ایک اہم قدم‘ قرار دیا۔
وزیر اعلیٰ نے صفاپورہ میں حکومت کالج آف انجینئرنگ اینڈ ٹیکنالوجی میں سائنس بلاک کا بنیاد بھی رکھا۔’’ٹیکنالوجی جدید کاروباری دنیا کی بنیاد ہے… ہمارے نوجوانوں کو مستقبل کی قیادت کیلئے تیار ہونا چاہئے۔‘‘
عمرعبداللہ نے بتایا کہ اس طرح کے اقدام سب کے لیے بنیادی سہولیات اور معیار زندگی کو بہتر بنانے کے لیے ہماری حکومت کے عزم کی عکاسی کرتا ہے ۔
